港區人大選舉星期三（19號）舉行，呢啲小圈子選舉，未選幾乎有晒結果，建制派通常都會投票畀西環欽點嗰40人名單。唔喺名單之上嘅候選人，真係好難爆冷㗎！點解呢？聽聽佘繼標「訴苦」就知嘞。
自知不列西環名單上
佘繼標噚日喺一個人大選舉論壇上大呻，知道西環40人名單上自己榜上無名，但都繼續拉票。點知呢，對阿爺唯命是從嘅《文匯報》以及亞視《把酒當歌》節目，就堅持封殺佢。佘繼標話呀，呢兩間紅色傳媒機構，不嬲都可以做訪問，點知最近卻say no，紛紛話20號之後先算，即係要等人大選舉塵埃落定先可以再接受到佘繼標「好意」，畀佢見報、上電視，以免激嬲西環喎。
佘繼標大鬧呢個選舉好唔公平，話西環名單上嘅40人真係同人唔同命；佢仲話日前有個西環低級官員公然同佢講，你唔喺名單上，注定「白跑」。不過呢，出席同一論壇、據聞喺名單上嘅參選人就紛紛唔認有名單，楊耀忠話冇聽過呢回事喎，范太亦話只聽聞好多機構都有自己心水投票之選，點都唔認有欽點。