聖誕節最好一班朋友喺屋企叫到會開P，一定比落老蘭更瘋狂，更Happy。以為到會一定係Order啲Hea爆嘅熱葷冷盤，其實到會亦可以Fine Dining，廚師上門即場獻技，還有侍應招呼周到。想氣氛更爆，可以請位花式Bartender表演沖調雞尾酒，絕對能將當晚氣氛推上高峯。
記者：陳芷慧
攝影：潘志恒、蔡家輝、伍慶泉
模特兒：Candy & David
靠大廚 在家Fine Dining
對於一個既貪吃又瘋狂的年輕人，就像永遠與Fine Dining無緣，穿一身華麗晚裝怎能狂歡感受普天同慶的節日氣氛呢？幸好，認識了Chef Johnny這位大廚，他說，今個聖誕節可找他上門為我們煮高級聖誕大餐，仲會用最上乘的食材㖭！咁都得？原來他任職的F&B Initiatives推出「Take Home Chef 私家節日盛宴」，提供廚師及侍應到會服務。由於公司老闆都是廚師，在飲食界有良好的人際網絡，能夠請到酒店級大廚設計八道菜嘅Fine Dining餐單，你還可以在旁觀摩大廚廚藝。
不過，我擔心屋企廚具唔齊全，怎辦？「當然廚具齊全就最好啦！有焗爐既可煎封扒，鎖住肉汁，又可以焗梳乎里，菜式變化會更多。不過，萬大事有商量，廚師會盡量因應你家中的廚具，在菜式上作少許變動。」Chef Johnny解釋。咁我就放心！在我家中不夠一百呎的廚房，眼見Chef Johnny煮菜仍能自如，端出一道又一道西餐菜式──法國黑魚子配波士頓龍蝦、洋薊忌廉湯配鮮藍蟹肉意式雲吞、焗新西蘭藍殼鮑魚「石春溫泉」等等，感覺很奇妙。
F&B Initiatives（8113 2555）
價錢：$2,988/位
* 一星期前預訂，包八道菜，除介紹的五道菜外，另有焗火雞、雪葩及甜品。
* 凡預訂12月24日、25日、31日和2013年1月1日之盛宴，收費則每位$3,488。
傳統火雞配有機醬汁
曾經嚐過銀杏館的中西餐都知道，除了部份是自家有機食材之外，菜式亦創新。不過，到會食物質素同樣高嗎？「雖然到會服務主要由火炭工場負責，但菜式一樣由行政總廚Dicki Law設計，水準一樣。」銀杏館三年前為了開拓更多資源和創造長者就業機會，而發展到會服務，餐單選擇多，不少大公司搞派對，都會找來他們的到會，口碑不俗。講番今次聖誕到會餐單，除了套餐以外，亦可散點，包含多國菜式，當然有聖誕派對必吃的雞翼和火雞，有點不同的是，火雞配以自家製有機洛神花醬汁、飛哥烤雞中翼配以有機桔蜜汁，兩道菜的味道甜酸，配搭創新。最佳Finger Food我首選法式香草薯茸迷你撻，將以燒汁燜得入味的田螺，與香甜的番薯茸加入香脆的曲奇撻內，可謂一絕。數我最愛甜品，一定是意大利栗子奶凍，師傅加入栗子茸後立刻冰鎮，栗子茸不會沉底，全杯奶凍非常香滑。
銀杏到會（8209 3088）
網址： http://www.catering.org.hk
*確認定單少於21個工作天，需要一次過繳付全數。
型格Bartender 調酒助興
之前搞大派對，都是請魔術師來助興，不過，要請一個充滿新意的魔術師其實好難。最近，我發覺最Magic的其實是Bartender，如果有他們駐派對調酒，既可以看調酒表演，飲品方面又毋須遷就各人喜好。香港調酒學校原來有提供Bartender上門服務，其學生或導師會帶同調酒工具，上門調製雞尾酒，為大家示範一般沖調動作，當然少不了玩煙霧情節，即時為聖誕節增添飄雪的浪漫感覺。如果場地許可的話，還可以請來一個花式Bartender，即場表演花式動作如拋樽等，當然價錢更貴，需要另議。
香港調酒學校（2765 0227）
價錢：50人以下 $160/位，50人以上$130/位
*每位包兩杯飲品，飲品會用膠杯盛載。