贏完曼城再埋新特蘭，坐穩英超榜首，同埋就嚟又到聖誕節，曼聯就喺上周六晚拉隊到里奧費迪南間意大利餐廳開party。講起球星開party，我求大俠即刻諗起啲酒池肉林嘅畫面，但睇番啲相，張張都好正經，仲好似係全男班咁齋㖭！
朗尼做宅男唔蒲頭
班球員都唔想咁寡㗎，但冇計啦，領隊費格遜落咗聖旨！自從07年嗰陣爆咗單曼聯球員攬80艷女、馬拉松式狂歡15個鐘事件後，費格遜就實班馬騮，唔俾佢哋再玩得咁癲。不過，全男班都有佢嘅浪漫，里奧費迪南、阿歷山大畢拿同尹佩斯3個搭晒膊頭，豎晒手指公咁，都見到佢哋玩得好開心。
除咗佢哋，傑斯、迪基亞、艾舒利楊格等都有嚟到，但偏偏就唔見咗朗尼。唔通又不和？鬧離隊？
各位曼聯球迷唔使擔心，講吓笑啫。上年朗尼話要喺屋企做宅男，睇英國拳手卡漢比賽，所以冇去party。今年雖然佢冇講缺席原因，但有傳媒搵到咁啱卡漢上周六晚又有比賽，相信朗尼又係寧願睇拳擊都唔想出嚟玩。
費Sir話1月唔增兵
此外，外界盛傳曼聯會喺1月買禾特確同史達寧，但費格遜上周六公開否認，仲話1月一個人都唔買㖭！但係兵不厭詐，可能佢怕俾人抬高個價，所以放吓煙幕都唔定。