【本報訊】港劇沒落，背後是一群編劇被壓迫的辛酸史。參與創作《壹號皇庭》、《笑看風雲》等經典的鮑偉聰在無綫任職編劇及編審廿多年，一直等不到公司給他一張工作枱，「當你淨係得個locker（儲物櫃）喺公司，你話尊重編劇創作，我說服唔到自己」。
監製連助語詞也管
鮑偉聰88年入無綫，四入四出。90年代他尚可呼吸一口自由空氣，「公司講個信字，畀我呢個新人孭《天地豪情》62集長劇，cast（班底）任你舞。我諗到乜就做乜」。
公司00年變天，管理層大換血，嚴格控制成本，港劇變得流水作業。此後創作經理每年開會向編劇收集「故仔」，再經「管理層」及「更高管理層」審批，創新題材難逃厄運。鮑曾提議開拍《壹號靈堂》講述殯儀業，「上司以為我講笑，淨係識聽家嘈屋閉、爭產故仔」。結果HBO數年後推出殯儀劇《Six Feet Under》。
通過審批的故仔也須「驗屍咁驗」，「行政單位要知道橋段、劇本分場都參與，監製甚至拎筆幫你改埋，逐個『呢』嘅助語詞幫你改」。
過去十年，雖然無綫劇集收視跌了十點，但仍穩守廿多點收視，鮑怒斥這群觀眾「犯賤」，「大家都係順民，就唔好怨有暴君。全球化年代有得揀，被動啲就熄機，積極啲就上街、投訴」。
曾轉戰內地的鮑偉聰坦言，如今港劇在內地的地位「跌到冇得再低」，「成日攞港劇來笑，製作粗疏、穿崩、冇景深，龍袍唔似龍袍，道具又假」。
但鮑強調無綫和港劇並非「冇得救」，因香港尚有創作自由，「諷刺時弊、開放性關係、鬼片，乜都拍得。內地人民嘅娛樂受操控，點會唔想睇香港無窮無盡嘅題材？」