證監會決定加強保薦人監管，投資銀行隨時可能負上刑事責任，最受惠梗係一眾投資者，其次就係律師，事關投行怕領嘢，一定落本搵律師幫手實啲細節，律師行Davis Polk & Wardwell新近就挖咗Clifford Chance合夥人Martin Rogers加盟，要攻投行生意可謂得心應手。
Martin Rogers喺行內相當出名，唔少城中富豪，如小小超李澤楷亦搵過佢幫手，新地（016）大股東郭炳江、郭炳聯捲入貪污案，佢亦有份代表郭炳江。
同陳翊庭拍住上
證監會之前就加強監管保薦人進行市場諮詢，聽聞就有廿幾間投行搵Davis Polk合夥人、港交所（388）上市科前高層陳翊庭（Bonnie）同Rogers幫手，寫咗個詳盡意見書畀證監會。
可想而知，兩人對於保薦人監管呢一瓣應該刨到熟晒，亦得到投行信任，將來做埋同事，要搵呢類生意應該冇乜難度。
查實唔止係保薦人，08年金融海嘯後，全球監管機構都加強各類監管，香港對於上市公司資料披露、內幕交易都加強監管，面對推陳出新嘅條例，投行同上市公司，特別係跨國企業，要避開地雷以免誤踩，難免要使多啲錢搵律師幫手㗎喇。
李華華
mailto:[email protected]