晉佳上周五講到，港股中線升浪可能去到尾聲，下周要入市，就要有即抽即中獎嘅把握先好考慮，至於中長線，最好等調整再低吸。12月5日晉佳建議買入安徽海螺（914），至今升12.9%，唔排除短線再急升一浸先見頂，現階段好幾隻二三線水泥股都未炒過，短線博一浸把握仲大啲。
二三線水泥股包括亞洲水泥（743）、山水水泥（691）、台泥國際（1136）等，隻隻走勢都不太差，其中台泥6月至今做咗個圓底，近兩個月成交增加，似係收緊貨，趁呢浸水泥股發威，龍尾股台泥有條件追落後。睇往績呢隻股一升起上嚟，單日升逾一成係家常便飯。
台泥產能主要位於華南，今年上半年收入升2%，即使明年產量冇明顯增長，都有機會擴闊利潤率。目前水泥價前景唔錯，因新增產能高峯期已過，加上內地經濟回穩，對價格構成支持。至於主要成本嘅煤炭價格就唔係咁好，行業面對高庫存問題，而運輸瓶頸逐漸解決，亦限制煤炭價格升幅，令水泥生產成本升極有個譜。即使係台泥呢類龍尾股，出年利潤率應該有升冇跌。
中短線睇2.6元
台泥今年上半年賺2.69億元，按年跌70%，每股盈利6.1仙，表現唔多好，毛利率17.2%，明顯低於龍頭海螺同中建材（3323）嘅26.5%同21.7%，至於6月底淨資產負債比率高達84%，同行家一樣負債沉重，所以半年嘅融資成本高達2.59億元，同盈利差唔多。水泥股負債高、固定資產佔比大，係缺點亦可以係優點，因為經營槓桿夠大，喺水泥價上升帶動收入增長嘅同時，成本偏穩，利潤增長將可倍數計，出年環境對台泥相當有利，盈利可以嘭嘭聲反彈。
台泥估值亦嚴重偏低，市賬率僅0.5倍，唔計金融海嘯低位係近15年最低。家港股再冇黑天鵝出現，加上行業仲開始復蘇，實在睇唔出中線估值有再向下風險，既然成批水泥股都想郁，就唔會少得台泥嗰份，中短線睇2.60元，中長線小注持有亦可。
晉佳
本欄逢周一、三及五刊出