狼振英政府為咗硬推新界東北發展計劃無所不用其極，喪播洗腦廣告吹噓係香港人嘅新市鎮，但就完全冇提新界東北各條受影響鄉村嘅非原居民，好似唔記得佢哋都係香港人囉。
為保意見平衡，東北三區聯盟同土地正義聯盟噚日推出新界東北區報創刊號，印成萬份隨街派，畀市民知道非原居民點樣備受左右夾擊。保育女神「寸嘴」卓佳佳仲喺文中指控，話有人開價200蚊收買支持發展嘅意見書，令公聽會有支持者眾嘅假象。
社運人士朱凱迪話，份區報嚟緊每個月15號都會喺粉嶺、上水派街坊，希望更多香港人醒覺，對抗融合、保衞家園已經刻不容緩。唔想咁樣，可以點樣？佢哋話，元旦日維園見啦！