聖誕將至，通常戰意會較低迷，但熱錢滾滾來，A股瘋狂反彈，基金奮不顧身追貨，好似有今生冇來世，港股推吓推吓已逼近二萬三關。早兩個月開始入市的戰友當然勁賺，如冇貨在手，應唔應該追貨呢？
魏力認為，目前熱錢追炒的對象，不外乎國策受惠股，如基建、鐵路、水泥、農業、頁岩氣及光伏股，仲要換嚟換去，短炒客見爆升追入，隨時「左一巴、右一巴」，其實非想像中易炒，回報絕不及Buy and Hold。現時先入場，注碼要嚴格控制，先買少少國策股坐中線，其餘資金短炒，爭取較佳回報。
上月底中央一號文件公佈，本欄即推介一拖（038），建議「買入擺埋一邊」，目前回報一成。升浪爆發，回報隨時以倍計。年結在即，本周起魏力將集中發掘「明年之升」，即有力倍升的股份，第一隻係中化化肥（297）。
農業股受惠補貼不在話下，呢隻股主攻化肥貿易，對價格波動較敏感，內地媒體報道鉀肥（佔營業額24%）價格已見底反彈，而受惠冬儲等因素，氮肥（佔34%）亦顯著上揚，利好中化肥。上周五爆升6.5%，收1.96元，創半年新高，並突破08年以來的長期下降軌，明年博賺一倍唔過份。
魏力
http://www.facebook.com/2012jason