曾經以筆名方卓如寫財經專欄嘅會計師龔耀輝，最近聯同會計師公會另一位理事鄭中正，不停炮轟公會強行加費，下一步係等會計界議員梁繼昌做嘢，兩人亦已去信財經事務及庫務局局長陳家強，睇吓政府會唔會介入事件。
玲玲師傅：增權力運
近年好少公開露面嘅龔耀輝為咗反公會加費，呢排亦經常粉墨登場，仲換咗新嘅鬍鬚look。聽講話佢已經留鬚一年，好唔好睇見仁見智，但見佢上周五現身公會周年大會時，呢個鬍鬚look唔打得都睇得，好有霸氣。
麥玲玲師傅都話，留鬚可增加權力運，令人權威啲，男人三十歲前留鬚麻麻哋，之後可以視乎面型考慮留鬚，但要打理得宜，否則一個唔覺意變成生意失敗look，就唔得掂！