喺立法會選舉慘遭滑鐵盧嘅白鴿黨，主席鐵頭何為此退下火線，噚日選出新主席，由「天生一副硬骨頭」嘅劉慧卿勝出。之前曾經有傳黃碧雲、又傳胡志偉會帶領個黨重新上路，點知全部都係煙幕！真命天子，原來係曾講過要裸退、應交棒畀年輕黨友嘅卿姐。花生友對白鴿黨呢個人事佈局，可歸納成四個字，就係「熱烈祝賀」！
卿姐雖然平日言論火爆，但佢曾經入過中聯辦就政改問題同北京「講數」，亦曾不念舊惡，向撐政改嘅左派群眾熱情揮手。呢副剛柔並重嘅政治身段，相信必能好好領導個黨。噚日選舉結果一出，網上一片「喜氣洋洋」，經常狙擊白鴿黨嘅「星屑醫生」歐陽英傑喺facebook留言話：「好開心！好開心！劉慧卿！劉慧卿！開心過中六合彩三獎！」點解咁開心？well，可能係日後狙擊行動會更有「睇頭」啦。
少壯派憂被禁講粗口
有社運中人士就不禁諗起，卿姐今年都60歲啦，說好了的「民主黨年輕化」去咗邊？不禁要問少壯派係咪應該「退黨保平安」？卿姐向來提倡「和平、理性、非暴力、非粗口」，有後生社運人就擔心，「今鋪真係唔准講粗口」。博客林忌就話，民主黨喺四面楚歌之時，選擇一個強硬嘅黨主席，係一個公關大災難咁話。點都好啦，卿姐始終係黨員投票選出，況且佢有149票，兩個對手單仲偕同區諾軒加埋都只係得147票，都唔夠佢多。
mailto:[email protected]