雖然係議會新丁，但陳家洛無奈要「走堂」，缺席今個禮拜三嘅大會。家洛當然唔係曳學生，事緣佢外母大人一直有病、稍後仲要入院接受治療，作為女婿嘅家洛亦同太太憂心忡忡，所以上周六已經同四千金以及出世無耐嘅家洛B，搭飛機去波蘭探岳母。查實今次係家洛B第一次去波蘭。波蘭家陣冰天雪地，凍到人騰騰震，驚唔驚家洛B凍親？家洛話冇有怕，事關外母一定錫到佢燶。有呢啲熱力護身，肯定可抵抗寒流。由於有七個人嘅行李，家洛呢次出門其實似搬屋。一諗起要佢喺機艙，將行李逐件「抓舉」上行李櫃，真係力的表現呀！