【萬千星輝頒獎典禮2012之今晚舉行】無綫小生花旦爭上位爭做視帝視后，孰勝孰負今晚直播的《萬千星輝頒獎典禮2012》自有分曉。無綫今年改玩普選，候選者各出奇謀，粉絲人多勢眾的林峯穩操勝券做視帝。視后方面，雖然民意顯示佘詩曼是視后頂頭大熱，但勁敵徐子珊昨日盡最後努力四出拉票，務求最後劏佘成功。
無綫《萬千星輝頒獎典禮2012》今晚舉行，花旦小生等派成績表，無綫今年玩新賽制，其中最佳男主角、最佳女主角和最佳劇集接受全民投票，這三個獎今日凌晨3時已截止投票。林峯粉絲多，視帝獎座已勝劵在握，《天與地》獲最佳劇集都走唔甩，不過視后方面就有變數，本報舉辦的「萬千星虧頒獎禮」視后本來由佘詩曼遙遙領先，不過臨尾票數變異，徐子珊忽然獲大量票源，反敗為勝。若徐子珊發動粉絲反攻，相信今晚無綫頒獎禮的視后寶座，徐子珊隨時可擊敗佘詩曼。
林峯連走四場拉票
無綫昨日安排徐子珊、林峯和馬國明到荃灣作最後拉票，姍姍來遲的林峯獲逾200粉絲撐場，聲威最勁。《雷霆掃毒》的林峯和子珊均掛着彩帶，叫大家投他們的號碼「8號」，視帝大熱林峯似乎已視獎項如囊中物，他說：「我當然有信心，自己20幾歲開始入圍五強，係時候有實質嘢喺手。」提到無綫昨日只安排三人作最後拉票，似有偏幫之嫌，林峯賣口乖說：「公司當然幫我，但公司個個藝人都幫，呢兩日我先有時間拉票，噚晚見到Eason（陳奕迅）媽咪，我都有即時上網揀好，叫佢㩒掣投我一票。」但原來Eason媽認不出林峯，還以為他是選區議員！出席完活動後，林峯馬不停蹄掛着彩帶到港台和商台拉票。
林峯兩日走四場拉票，前晚他在九龍灣為《蝦仔爹哋II》做嘉賓，台上慘被林建明抽水，但林峯慌亂間仍不忘拉票說：「摸冇問題，你投咗票未先？」
視后黑馬徐子珊昨日向電影劇組請假來拉票，問到信心如何，她說：「要投嘅都投咗，我係嚟呼籲吓。」她認為其他候選視后因工作才無暇到場，她說：「一個人有啲孤單，明年入圍希望多啲人嚟拉票。」她還未諗到若得獎的謝辭。馬國明則謂平常心出席頒獎禮，他說：「賽果可能爆冷，陳豪同祥仔都有機會。」
剛在大馬贏視后的楊怡昨日在大埔出席聖誕活動，提到昨日缺席無綫拉票活動，她說：「14號拉咗，而且呢個活動一早簽約要做。」勁敵子珊連日瞓身拉票，楊怡表示已盡力：「我都叫咗樂小姐（樂易玲）嘅屋企人投票，我希望全港九市民支持我。」昨日網上流傳維基百科驚現今晚台慶頒獎禮賽果，當中指林峯和阿佘奪視帝視后，最佳劇集是《天與地》。
黎耀祥：投番自己
競逐視帝的黎耀祥昨晚到荃灣跟觀眾齊看《大太監》結局，他昨在電話中謂相信大家已投票，故不會有特別造勢行動：「我都投咗，老實不客氣投番自己，其他《大太監》入選嘅演員都投晒。」昨晚現場約有200名觀眾撐場，眾演員以古裝出場造勢。《大太監》昨晚分別播出兩個結局，包括電視直播胡定欣死的結局，而myTV則播出祥仔出賣米雪的另一結局。無綫外事部副總監曾醒明表示，《名媛望族》和《大太監》分別在商場播出大結局，為無綫帶來近七位數字進帳。
採訪：溫敏芝、卓寶花、馬建華、盧妹
攝影：陳慧安、李志明、吳耀輝
