梁特首上任就快夠半年，六個月啫，睇佢於十二月十一日站在立法會答辯，面容有啲憔悴，臉頰開始凹陷，頭髮有黑色變灰色跡象，而且眼神冇咗競選辯論時嗰種銳利，左丁山唔係中醫，唔知梁特首患上甚麼病徵，但憑常識估計，佢就係患上心情焦慮症，內心不忿，心火在內燃燒，導致虛火上升，睡眠不足等等症狀。治療方法好簡單，就係暫時放開懷抱，走去馬爾代夫、大溪地等陽光海灘渡假勝地，不帶手機、不睇電腦，與外隔絕咁放假十日八日。
不過咯喎，以梁特首嗰種不服輸，性好辯，情願輸道理也不輸把口嘅性格，叫佢放開懷抱去放假，難啲啫。官場耳語傳聞，梁特首好鍾意自己份工，誓要幹一番事業，佢嘅標準工時係一個星期起碼一百小時，根本冇時間外訪參加國際會議，遑論出外放假，咁就麻煩咗政務司司長林鄭月娥，要代特首出外參加會議，忙上加忙。有人傳話俾啲記者：「唔該你地不時提醒及鼓勵特首出外訪問，唔駛學曾蔭權去咁多次嘅，不過都去吓啦！」
梁特首不外訪、不放假，勤力工作到好似花生佬卡達，恐怕下場一如卡達，就係尋求連任失敗，只做一任行政長官，下屆2017年，按目前梁特首民望，點樣參加直選呀？不過泛民方面，始終搵唔到一位可以有資格、有能力贏到特首直選嘅人物出嚟參加選舉，令人痛心。
「我冇講過我冇僭建」，係2012年香港金句，與「梁振英，你呃人」之唐英年名句互相輝映。還有四年半，香港點樣渡過呀？令人心焦。雷鼎鳴教授在「香港經濟峰會2013」發言，講咗：「弱勢政府要有作為，難搞！」強勢政府要干預市場，已經不易，弱勢政府還想伸出有形之手，指點經濟發展，指揮地產市道，確係得啖笑。不過想深一層，唔好笑呀，雷鼎鳴話政府有形之手要摧毀樓市嘅話，話咁易。如果面紅耳熱嘅行政長官為求提高民望，錯誤地以為推低樓價合乎民情，可以提高佢嘅民望，亂嚟一通嘅話，大家攬住死。