九十年代港台節目《柏林週記》嘅童星鄭柏林（小柏林）轉眼已經27歲仔，佢家喺警隊擔任督察，前日仲同拍拖兩年嘅OL女友劉律心拉埋天窗，一對新人低調喺佐敦逸東酒店擺酒。雖然柏林離開咗娛樂圈，但薛家燕、吳孟達、杜琪峯、前廣播處長張敏儀以及童星出身嘅王書麒同唐寧都畀面去飲。
杜琪峯執導嘅電影《奪命金》前晚喺亞太影展獲最佳影片獎，但佢寧願去飲喜酒都冇出席頒獎禮，認真畀面。原來柏林當年拍過杜琪峯執導舊作《愛的世界》，仲憑呢部片獲得第35屆亞太電影節最佳童星獎，杜琪峯話送利是畀一對新人。
婚宴感人
70年代《小時候》童星王書麒同老婆許秋怡拍拖去飲，書麒噚日喺電話大讚婚宴感人：「我見到稀客大姐張敏儀，我同柏林當年都得到佢提攜。」
柏林媽咪亦喺電話度多謝張敏儀、杜琪峯、契媽潘冰嫦、導演陳木勝、李蕙敏嚟飲，佢好開心咁話：「好感激佢哋，雖然嘟姐（鄭裕玲）、松哥（劉松仁）、張衞健嚟唔到，但拍咗片祝賀，佢哋睇住柏林大，錫到佢燶。我真心多謝嘟姐，柏林喺佢身上學到守時，家做紀律部隊好受用。」
撰文：馮仁昭
