【昔日危機】
由新蒲崗一間冰室變成今日市值數十億元的連鎖茶餐廳，翠華曾經歷兩次重大危機。一次是95年飲食業減價戰，另一次是03年沙士時期，李遠康指當年生意暴跌，要忍痛為剛買下的地皮撻定，個個月業績「見紅」。如當時無業主、員工及供應商肯「收順啲」，翠華早已沒頂。
05年危機轉走高檔
問及翠華最低潮時間，李遠康毫不猶豫就回答是03年，「我02年底剛喺牛頭角買咗塊地，諗住起總部，落晒定金。點知03年初沙士升級，睇住啲生意係咁跌，連自己仲有無命都唔知。我份人好硬頸，一直唔想放棄塊地，最後好多人一齊勸我，我先決定撻定。」
沙士時翠華生意曾大跌逾30%，李遠康指業績個個月都「見紅」，「最後要業主減租，識咗十幾年的供應商又八折供貨，連員工都自己走嚟同我講，願意減5%至10%人工，先可以捱過去。如果唔係大家撐住，翠華一定執咗。」
翠華另一次危機，要數到95年，當時本港樓價大調整，經濟氣氛轉差，餐飲業爆發減價戰，「最記得當年M記推出『2、3、4』優惠券，9蚊就有三樣嘢食！間間茶記都鬥減價，迫死咗好多人。翠華就係當時決定，要轉走高檔路線，先避過呢一劫。」