【公司專訪】
貴價茶餐廳翠華（1314），挾着每張枱每日做25張單、店舖一年內能回本的驚人效率，成功以高估值上市，但就被投資者形容翻枱「已達人類極限」，恐以後高增長無以為繼。不過，身家暴漲的老闆李遠康並不認同翠華「見頂」，揚言翻枱率等指標「仲有得升」，未到極限。
記者：鄭柏齡 吳綺慧
翠華在中、港兩地共有26家分店，上市至今市值達33億元，即平均每間分店價值1.2億元，當中更無舖位是自置，很難不令投資者質疑這個估值是否存在水份。加上翠華近年高速開舖、加價，香港旺區基本上全面進駐，而內地業務又經驗尚淺，未來會否維持到盈利質素，備受關注。
下午茶同消夜未去盡
李遠康認為，翠華很多地方仍都未做到「極限」：「你睇25次翻枱率好似好高，但其實係個平均數（據資料顯示，翠華有8間分店是24小時營業），唔係間間都咁高。一日做五個市，下午茶同消夜都未用盡㗎！我知道市場有啲細間茶餐廳，翻枱率仲高過我哋，所以有人覺得係極限？哈哈，我就認為仲可以提升。」
但翠華在香港已超過21間分店，再大舉擴張就肯定要到新界住宅區，以其19元一杯凍奶茶，平均74元「埋單」的消費水平，精打細算的新界區師奶們會肯幫襯嗎？
「翠華在屯門大興邨已經做咗30幾年，新蒲崗都開咗41年，如果住宅區係做唔掂，我哋執咗啦！沙田我哋啱啱開咗，係東鐵沿線第一間，元朗、東涌都仲未開，仲有大把地方可以開，最緊要係個『牌子』做得好。」
不過，當記者再三追問住宅區分店的賺錢能力是否較低，李遠康就始終沒有正面回應。
李遠康形容，翠華食物可能比別人貴5%至10%，但以「是否物有所值」來講，他覺得是「抵食」，「好似焗豬扒飯，我哋專登入咗部真空豬扒按摩機，幫啲豬扒做massage，連焗爐都揀咗好多部，家嗰部係德國買回來，成10幾萬，但可以控制到個飯唔乾身，其他行家焗爐一般都係幾萬蚊。背後嘅嘢一般人睇唔到，但我夠膽講我哋質素唔差得過酒店！」
旺店日賣千個奶油豬
翠華每年轉餐牌兩次，除了轉換新菜式，亦會按需要加價。翠華近年最成功的招牌出品「奶油豬」，李遠康指當年只是見一枱食物都是「鹹」，想食「甜嘢」，才嘗試豬仔包搽煉奶牛油，想不到反應如此理想。現時翠華旺區最勁的分店，單日可賣出1000個奶油豬，其他分店亦平均可賣出200至300個。
而自由行的興旺，亦幫了翠華一把。李遠康不願披露現時自由行顧客的比重，但據其他管理層透露，以尖沙嘴分店為例，至少有40%客人是講普通話。
李遠康稱不會只做某類人生意，無論在中、港都會堅持港式風味，「總之潮州魚蛋要有潮州味，馬來咖喱就要跟番幾廿年前的配方做。」
專家論翠華追揸沽
【再坐一會】
凱基證券營運總裁鄺民彬表示，翠華的經營模式獨特，知名度高，在內地有一定市場，雖然公司上市定價進取，但街貨不多情況下，投資者可「再坐一會」。
【暫勿追入】
AMTD證券業務部總經理鄧聲興表示，翠華上時「超標」定價，加上已累積一定升幅，不建議投資者追入，值博率不高，但若有貨的投資者則可以揸多一陣。
