表面睇嚟，行會成員羅范椒芬同公民黨主席余若薇老公胡健維醫生，大纜都扯唔埋，咁為乜羅范噚日會同胡醫生一齊飯局聚舊呢？哦，原來胡醫生同羅范老公羅延康，係香港大學同屆醫科生。話說佢哋呢班港大舊同學，上周六喺佐敦搞活動聚舊；忙於為人大選舉拉票嘅羅范，罕有做咗「跟得夫人」，陪老公出席。但胡醫生當日就單拖赴會，冇拖住余大狀以夫妻檔亮相。八方所見，當日羅生一見到胡醫生呢位舊同學，就好熱情咁握手問好；羅范亦即刻上前，寒暄兩句就問余大狀嚟唔嚟？相當關切咁喎。莫非有好多女人密偈，諗住同余大狀分享？