呢一晚，NBA賽場上勝負係其次，最重要係人間有情！塞爾特人日前作客火箭，除咗開波時為上周六康涅狄格州紐敦市校園槍擊案嘅死難者默哀外，喺主隊以101:89大勝之後，塞軍嘅加尼特仲同早前女兒因病離世嘅「伯樂」麥希擁抱安慰，場面感人。
麥希賽後流男兒淚
賽前全場為紐敦市校園槍擊案嘅死難者默哀，唔知麥希係咪諗起囡囡莎薩，一時耷低頭，神情哀傷。
今仗夏登依然搶晒啲機會，全場17射6中得21分，而林書豪喺第4節就全程坐冷板，只係得5分、7次助攻。不過，咁反而令後備兵格克史密夫有大把機會，畀佢攻入20分。最後火箭以12分大勝。
賽後，加尼特第一時間走向火箭後備席，搵喺1995年以木狼總經理身份，於選秀會揀中佢嘅麥希；之後加尼特更攬住佢，一邊講嘢一邊拍麥希背脊，跟住見到麥希開始忍唔住流下男兒淚，相信加尼特係安慰麥希，希望佢可以走出女兒逝世嘅陰影。不過，一向cool爆嘅加尼特，繼續做型男：「我見到麥希，然後同佢講咗啲支持說話之嘛。」上季為麥希打波嘅C李爾都上前安慰對方。
雖然the show must go on，但係聯盟中人都因槍擊案有感而發（見另文）。塞軍教練李華士就話：「真係好難受，今日仲要比賽，係因為比賽就係我哋嘅工作。不過作為家長，呢次悲劇真係好得人驚。」