美斯的單年入球紀錄事件就快要變成鬧劇了。那天晚上，隨着傳媒連月倒數式的放大這個日子的來臨，有點衝動想留守至凌晨4點睇波，尤幸最後理智戰勝了感性上床去了，否則只會更後悔。
首先，單年入球的紀錄在足球來說，意義本來就很低，因為我們的聯賽都是跨年比賽，所以所謂世界足球先生之類的年尾投票選舉本身價值亦有限，季尾總結才是比較合理的，在傳媒們大煲特煲之前，究竟有誰知道這個紀錄擁有者是武勒呢？而武勒自己又知道嗎？
然後，隨着美斯順利「打爆大佬」之後，竟然引來世界各地的抽水反應，贊比亞球王到薛高到比利，人人都宣稱有個未被確認的personal best，有證有據又如何，甚麼年代甚麼水平本來就很難一概而比吧，就差咗我們地大物博的國內未有熱血人士又引經據典癲埋一份啫，這一次國際足協真係抵讚，在人人有紀錄的醜態百出之際，佢哋公開話，唔會承認美斯呢個係官方紀錄，原因係世界之大，各地各方比賽何其多，話得美斯呢個係紀錄的話，即是話你要check晒其他所有有可能製造紀錄嘅比賽，黐線咩！所以FIFA話只會承認自己搞嘅比賽的神射手，其餘不理，聰明！
反而越搞越「信不信由你」嘅健力士世界紀錄，就急急走出嚟話已經將美斯紀錄確認咗，邊個喺自己臉上邊貼金一清二楚，以健力士家陣成本世界獵奇大全咁嘅定位，本身佢就有咁嘅空間接受晒所有所謂紀錄，只要將佢分門別類為「非洲紀錄」、「非官方紀錄」、「比利紀錄」、「比利自己話的紀錄」等等。
美斯雖然係勁，但仲未係最勁，學武勒話齋，「攞咗世界盃先講！」，仲有位網上評論人士鬧美斯係垃圾，因為佢入波雖多，但係太少首名入球，累作者經常輸錢。坊間有云紀錄係用嚟破嘅，破口大罵嗰個破！
keyman
now TV主持
mailto:[email protected]