【虔誠教徒】
除了被譽為商界橋王，陳立業尚有多重身份：虔誠的基督徒、出過十多張唱片的福音歌手、微博粉絲逾11萬的網絡紅人。不過，陳立業投入侍奉、熱愛音樂的個性，並非自小受薰陶所致，他亦曾討厭別人向他「講耶穌」，加入詩班唱到走音被人鬧。
「我細個好怕人同我講耶穌，覺得好悶，唔啱我，一聽到我就會走。」直至在加拿大讀書時，他接觸到猶如流行音樂般的福音歌曲，才令他覺得「好勁、有feel」，「啲歌堅到可以上美國Billboard，我先知原來呢樣嘢唔係咁悶，先有心機去了解多啲。」
成為基督徒後，陳立業決心要搞福音歌，希望感動曾與他一樣頑固的年輕人。他自言天份不高，在大學加入詩班經常走音：「當時成日被人鬧，都幾唔開心㗎，但我好畀心機練好佢，又自學作曲。」
畢業後他原本在加拿大工作，有日聽到香港福音樂隊「轉捩點」的歌，覺得「好型」，甚麼都不理就飛回香港，「我覺得好想參與，完全唔理有無機會成功，總之返香港上佢哋嘅辦公室show up（現身），話想參加，我仲記得當時個經理人一嘢就拒絕我，我唔死心，繼續做助理。」
曾任羅文演唱會和音
玩音樂期間，他認識了不少知名音樂人，如金牌監製金培達、嚴勵行等，他更曾在羅文演唱會中擔任和音。「我一路嘅理想係做福音歌手，當年原本只係想搵份工糊口，然後集中精力做音樂；但事業上發展順利、成功，反而令我搞音樂嘅時間越來越少，到做旅發局，直情忙到連教會都冇返。朋友都唔約我，因為知我實甩底。」
直到03年沙士，旅發局活動全面停頓，陳立業才有時間靜下來諗「咁做嘢法，為乜？」因此由04年起，他重投福音歌手生涯，「我唔會停，以後會一直做落去。」