【銅鑼灣】去年港姐亞軍朱希敏同07年落選港男李善恒拍拖已經係公開嘅事，所以佢哋出到街亦冇避忌，成日見到佢哋晒恩愛。前晚7點幾又見呢對拖友喺銅鑼灣出現，朱希敏一身黑衫加外套梳起個髻，男友李善恒一啲都唔怕冷，只係着住件汗衫戴頂cap帽，露出壯碩嘅手臂同有少少飛釘。
朱希敏佢哋先去一間果汁店買果汁，等嘅時候有講有笑不知幾恩愛，之後佢哋去咗幢食肆林立嘅商業大廈，不過唔使10分鐘就落樓，相信係攞咗籌等位趁空檔去行街。
鬧巿晒恩愛
兩人十指緊扣先去咗㩒錢，然後上咗時代廣場嘅Zara睇衫。講到睇衫當然係女士嘅強項，見到朱希敏如魚得水咁自動波走咗去女裝部試鞋試衫，仲逐件放上身照鏡完全忘記咗男朋友嘅存在一樣。李善恒可能已經習慣咗呢類場面，好乖咁企喺旁邊等，睇咗大概20分鐘，朱希敏雖然買唔成，但已經好滿足咁同男朋友離開。
採訪、攝影：李志明、吳耀輝
