大前年「串燒四兄弟棟篤唱」（Big4老作）空前成功，之後改名Big4。
Big4是一支平均年齡約45歲的中佬組合，全組人加埋接近180歲，但他們會唱會跳，吹水最強，成立僅兩年，目標好簡單，為求自己開心，同時帶給觀眾歡欣。
難得張衞健、蘇永康、許志安、梁漢文相識廿載情同兄弟，遇過高低起跌，多年來互相扶持，雖然性格各異，亦可以和諧共事。
前年中佬組合Big4首度踩入紅館全場爆滿，明年乘勝追擊，農曆年搶手檔期開足六場跟大家過年，之後鴻圖大計準備世界巡迴，目標是撞入英國倫敦國際舞台The O2 Arena，挑戰陳奕迅的速銷新紀錄。
撰文：楊潔雯
陳淑芬有先見之明，見到張衞健（Dicky）、蘇永康（阿公）、許志安（老鼠）、梁漢文（Edmond）想起《西遊記》，張衞健說：「陳淑芬見我哋四個成日走埋一齊，一開始叫我哋搞《西遊記》舞台劇，我就梗係做孫悟空，Edmond係唐僧、許志安做沙僧，蘇永康唔使講梗係豬八戒喇，仲要唔使化妝！」眼前開始出現幻覺，所有人對號入座，梁漢文在沙漠坐着一頭馬，頭戴金剛圈的張衞健拉着馬頭，許志安和蘇永康尾隨其後，然後Big4開始大話西遊。
亂噏當秘笈
內斂沉穩的唐僧梁漢文先說了一些開場白，他說：「最早期係好想一齊去登台走埠同旅行，家願望達成，大家都好開心。」在唐僧講話的時候，馬騮仔健仔在師父耳邊獻計說：「講埋加咗歌酬呀！」
《西遊記》本來就精采絕倫，如今四師徒開騷，哪會如此風平浪靜？沙僧安第一個跳出來申訴說：「開頭開會時間好唔專注，真係好唔慣，要做乜嘢度乜嘢，講講吓，有人又問你有冇睇邊個嘅騷呀？扯到好遠去咗大西洋，當時我好嬲，成日講東講西，講去第二度，不過家開始發覺開會真諦，其實我哋幾個咁樣先開到會，我哋四個認真喺埋一齊係度唔到嘢，係習慣咁先有嘢。」八戒蘇永康想重申自己的論點說：「開會係要think out of box！」坐在對面的悟空梳一梳光頭問：「乜嚟㗎？」沙僧安刻意拉高八度將out讀成狗，他說：「即係think狗of the box，叫你唔好成日諗嘢喺個框框度呀！」八戒康隨即再加一腳說：「識唔識英文呀你！」
互封遲到王
悟空慘被圍剿，即刻轉移視線，一本正經地說：「上一次Big4第一日做宣傳，覺得好有問題，人哋問第一條問題，個個靜晒，dead晒air，你讓我我讓你，人哋再問，大家可能意識到唔掂，第二個問題就搶住答，咁樣好嘈。」
突然，沉默寡言的唐僧說：「就係咁樣呀！我哋平時慣咗獨立做。」三位徒弟同時點頭承認，悟空補充說：「四位一體咁做，係另一個技巧！咁點呢？即刻call out一個好urgent嘅會，講點樣做一個組合presentation，所以到今次唔駛講嘢，好舒服！有晒默契做訪問，幾時邊個講，幾時呢類型邊個講，幾時邊個想食枝煙邊個會頂住㗎喇！唔使一定四個坐晒喺度，邊個未到呢個就頂住先。」悟空一邊講，一邊盯着剛剛遲到的人，沙僧安先發制人說：「我好少機會遲到！開會最早到係咪我呀？」這個時候師父唐僧再一次主持公道說：「你有冇諗清楚呀！」師父一聲令下，沙僧安縮一縮膊頭，不好意思地說：「呢一part唔係好記得。」之後大師兄悟空站出來為師父護航，他說：「我諗最早到就係Edmond，我好公道，我就唔會話自己最早到，我係中庸之道，執輸行頭慘過敗家，我就係做中間，通常老鼠係最world boy，佢會話出門口打畀我喇！因為阿公配飾多，你睇佢戒指戴多兩隻，佢點可以咁早到，梗係要原諒佢。」坐在沙發上的阿公揣一揣手上的戒指，不以為然。
磨合生默契
四師徒合作，由誤解經過迅速磨合而成為默契十足的Big4，全因一顆犧牲的心，悟空說：「我哋永遠埋位影相都係先到兩個或者三個，係永遠唔會企中間位，係會讓個中間位出來。」沙僧安合拍地和應着：「慣性冇傾過。」悟空接棒再說：「咁樣可以反映到我哋心態，我哋深深明白到大家係四個獨立個體，我哋四個亦唔係新人，喺呢個圈度亦有自己嘅地盤同成就，如果大家仲以番自己係主角嘅心態，就一定死梗，一定嗌交，我哋明白呢點，所以有個讓嘅心態，會自動自覺，又唔會話推讓企中間，總之早到企側邊，補完妝咪自動攝中間個位，因為大家有個小小犧牲心態，可以令第一次Big4由組成、綵排、演出到接受掌聲，都喺一個融洽氣氛下完成。」
八戒康拍枱附和說：「如果搞得唔開心就唔好做，因為四個人經濟效益，雖然係加咗價，比起分開做騷，自己一個人嘅歌酬，仍然係多啲，甚至有人多好多。」調皮的沙僧安即刻玩踢爆說：「佢蝕㖭喇！為咗Big4蝕錢我覺得阿公冇得頂！」八戒康未有理會沙僧安，自顧自繼續說：「要完成一件事，必須要有所犧牲，但係我哋唔會覺得係犧牲，係一個集體回憶，能夠做到一件事，自己又開心，觀眾又開心，係好事。」
憤怒鳥爆粗
四師徒性格鮮明，各具特色，包容和扶持是好重要，八戒康說：「因為認識二十年，彼此認識大家性格，有啲人幾收埋，內向啲，家好咗少少喇！」說罷，三個人六隻眼望着正在沉思的唐僧，八戒康續說：「我一定要搵人傾，安仔都係。最主動就係健仔，佢最識搵位入。」果然，健仔正如大師兄孫悟空一樣料事如神，此刻沙僧安竟然燃起一絲妒忌，他說：「佢係好易聞到味，佢係狗嚟㗎嘛！」悟空即場用粗口還擊，沙僧安知道大師兄憤怒鳥，便安撫說：「佢係老大，洞悉世情。」此情此景，引得全場人哄堂大笑，Big4大話西遊，亦在歡樂的笑聲中結束。
許志安
髮型：Billy Choi of Hair Culture
化妝：Ling Chan of Eingthe make up school
張衞健
化妝：江中平 of A&V make up school
蘇永康及梁漢文
髮型：Moe of MM ILCOLPO
化妝：Maggie Lee