有一日買完一大包狗糧，雖然回家的路程不遠，不過最後還是選擇了搭的士回家。「你屋企後門唔係有條樓梯可以行返去咩？」的士司機問我。
「係呀，不過今日買咗好多嘢，所以搭的士囉。」
「行多啲樓梯好呀，當做運動囉！」被的士司機這樣一說，心中有一份內疚感，不過叫乘客不要搭車的士的司機，都是第一次見。
司機繼續說：「我日日都唔搭屋企部升降機，寧願行樓梯上樓！因為做司機成日坐喺度，好少走動，所以有機會就會多做運動。」
「咁又係，做運動身體健康啲，加上最近仲有好多巴士同的士司機揸揸吓車暈咗，多數都係隱性心臟病。」
「咁你識唔識揸車？」
「識……」
「如果我暈低，你第一時間就要爬上嚟踩住個brake……」
跟住，司機就教我操作的士的方法，還叫我搭巴士時，最好站在司機附近，看到司機有不對勁就要第一時間幫手。我真是有點慚愧！退役後經常都提自己要多做運動，但很多時都會用「太忙、沒有時間、寧願睡覺、明天跑雙倍……」等等偷懶的藉口。直到司機的一番話，才令我重拾做運動的決心。生活上其實很多運動的機會，多走路已經是其中一個方法。如果等到身體變差後，才開始做運動，就會事倍功半。只要有令自己健康的恆心， 生活上很多疾病都可以預防，所以大家都要居安思危，像的士司機一樣多做運動啊！
蔡曉慧
TVB體育世界主持
mailto:[email protected]