世界末日前，英國波卻在嘆慢板，等候本月下旬起瘋狂11天打4場嘅賽期來臨。波友也應好好珍惜本輪可能係今年最後一輪正路波；正氣中嘅正氣，今次選愛華頓，作客到向來主場硬淨季季保到命嘅史篤城，平手盤及客W兩注出擊。
周日起一連3天5場英超全開入球「大」兼4個讓球上盤（唯一下盤係唔少人撐嘅曼聯殺低曼城），可見正常賽期、傷停、調兵部署連普羅波友都大致清晰掌握到嘅英超聯，不難頻開多入球又好睇到尾嘅比賽。當中，尹佩斯罰球能絕殺曼城，係嚇到前阿仙奴隊友拿斯尼縮喺高佬迪斯高後面，求其將腳一伸，皮球彈入網窩；曼聯無疑着晒火傷疲盡起，但上仗贏得夠運，今莊家開到[-2]迎復蘇新特蘭，上仗中3倍冷W者例飛支持夠了。最深刻反而係愛華頓喺89、91分鐘仲㩒到掣入兩粒，反勝近績卓越嘅熱刺；個人認為係上輪9支英超winners，表現最具說服力嘅一隊。
熱刺呢支之前4連勝嘅on form球隊，冇加里夫巴利有「前富咸孖寶」丹普西同迪比利帶動踢落唔下風兼能末段領前；愛華頓最後搶番個W唔係靠王牌費蘭尼，更能反映隊波今季唔只似上兩季聯賽都係7哥，尤其奠勝嘅謝拉域打得番上季水準，愛軍呢雙箭夠照。望莫耶斯畀啲領愛華頓更上層樓嘅決心，下月留住費蘭尼吧！史篤城打主場硬淨，對上一次聯賽敗陣係今年2月初負新特蘭，但今季大軍實力只能維持，近績非勝即和只恰下游球隊；上仗作客和維拉，全場僅2次攻門俱不中框，和到靠守力，入波靈魂高治踢到甩牙小休一輪喺上仗後備入場唔在狀態，今場愛軍英格蘭新貴中堅菲臘積基爾卡嘜到佢唔難。最要防備史軍反而係中場大佬查理阿當停賽後復出。一周一賽實力及近況兩項指標睇重啲，下周中全部英超隊免戰會令今輪繼續精釆，球迷可多攻賽前及走地入球「大」，但還是愛華頓坐和望贏最有信心。
英冠亦循正路思維選材，上周力指迎米堡嘅彼德堡呢條大魚腩睇怕俾人食兩口，今次佢哋作客到主場10戰全勝嘅「1哥」卡迪夫城更冇得揮，主W嫌熱不如攻波膽；早場由前新特蘭領隊布魯士掌帥後表現上揚嘅侯城，迎賣走射手佐敦洛迪斯畀布力般後，升班表現勉強嘅哈特斯菲爾德，單W或[-1]可作過關膽。(下次見報日期：22/12)
文：蘋果波神