【上海→成都】現年44歲的吳倩蓮同劉德華嘅《天若有情》都可以列為經典電影，近年吳倩蓮已經轉戰內地拍電視劇賺人仔。當年坐電單車尾嘅吳倩蓮今日已經貴為人母，前日佢同老公、囝囝一家三口現身上海機場。
頭髮花白
冇化妝嘅吳倩蓮打扮樸素、頭髮已經有啲花白，身邊就拖住3歲多嘅囝囝，兩人表現好親暱，蓮妹老公個樣就好似留咗一面鬍鬚嘅張家輝，佢好cool咁喺旁邊打電話。小朋友一直玩手機，蓮妹就笑笑口望住佢玩，佢不時同囝囝夾雜中、英文對話。之後一家三口就上咗往成都嘅飛機，佢哋坐嘅係經濟客位，只係位置稍前。
約三個鐘後，飛機降落成都雙流機場，因為天氣比上海凍，吳倩蓮換咗件深藍色毛外套、黃色嘅長筒雪靴落機。佢哋先去到洗手間梳洗，囝囝就用飲水機斟咗一杯水飲，跟住佢哋就去攞行李。喺等行李嘅時候，似乎冇乘客認出吳倩蓮嘅身份，當佢推住行李步出閘口發現有記者，雖然佢有啲吃驚，不過依然保持微笑禮貌拒絕採訪，並且加快腳步離開。
夫罵記者
而吳倩蓮嘅丈夫見到記者拍照時，就大聲用英語對記者話：「Get out！」接着快步上一咗架的士離開。
其實蓮妹同佢老公一直都好低調，當年07年結婚都係趁去美國拉斯維加斯旅行順便註冊結婚，第二年囝囝就出世。據知佢老公姓曹，從事醫藥行業，婚後一家住喺上海。
撰文：李森