【隔牆對論】
法定最低工資將由28元加至30元，標準工時政策研究報告亦已殺到。工黨主席李卓人提倡44小時標準工時、時薪倍半補水方案，挽救日做逾12小時「賣血、賣命」的打工奴隸，估計會令總薪酬開支增加215億元。「呢筆錢，其實係僱主一直食緊打工仔嘅霸王餐」。
記：《蘋果》記者 李：李卓人
政府報告估計，去年最少31.6萬打工仔超時工作冇補水、72.5萬人每周工作逾54小時、個別行業如保安工時最長達70小時。
記：你對標準工時、加班「補水」、最高工時的立場是甚麼？
李：職工盟支持44小時標準工時，時薪倍半加班補水，最高工時60小時。公務員家係44小時，呢個起點最易令人接受，影響最少。以前大多數加班補水都係用工半。要埋最高工時，如果冇咗，可能係僱主減你底薪，畀番加班補水。
例如你時薪35蚊，佢減番到30蚊，跟住不斷叫你加班，咁你一樣係做足12、14個鐘，有乜意思？定係60個鐘，係當五天工作，每日都12個鐘。我哋唔反對有啲豁免，但要逐個行業、工種傾，集體談判。
根據報告評估，若標準工時定為48小時、倍半補水，僱主或會將保安員由兩更制改為三更制，以節省補水開支，保安月薪會由原來的10,800元減至7,200元、減薪33％。
記：有了標準工時，工人卻或會減薪，到底是幫了工人，還是害了工人？設立最高工時，又會否有違多勞多得？
李：大家思維要變，唔係靠一個人打工養全家，可能兩個人出嚟做嘢，婦女都出嚟做嘢，咁月入會由7,200變14,000，同時要爭取低收入生活補貼同課託服務等配套。起碼唔使一個人日做12至14個鐘「賣血、賣命」，可以有家庭生活。如果用多勞多得角度去睇，咁巴士司機揸殘自己，可能會影響人哋、家庭、有醫療開支等社會代價喎。所以我覺得，社會同個市場要有平衡。
報告推算，推行標準工時，每年薪酬開支會增加80億至522億元；僱主極度反對。張宇人曾指業界以「災情」、「死硬」形容有關政策。
記：44小時方案，會令薪酬開支增215億元。可有想過會令營商困難？
李：就算係真，呢200幾億，係僱主本來應畀嘅加班錢，但家冇畀到，咁同食霸王餐有乜分別？如果呢個係個成本，家其實係由打工仔付出緊；如果要講成本，咁唔該計吓勞方家付出咗幾多成本！張宇人乜都話死硬㗎啦，最低工資，「廿蚊張」又話失業又話倒閉，家不但冇裁員、冇倒閉，仲請唔到人呀！信佢都雙目失明呀，歷史證明僱主係靠嚇。
廿幾年前我哋爭取120日病假，僱主都話成本增加、會執笠，爭取長期服務金……單單佢哋都咁反應，狼來了得太多次，冇人信。如果標準工時係世界末日，107個國家裏面有101個有標準工時，點解101個國家都冇倒「冧」呀？點解香港會咁落後呀？台灣、日本、南韓、新加坡有，係香港咁落後，你仲要反對？
記：你請議員助理，做到標準工時嗎？
李：有！我哋44個鐘㗎，冇工半，但有補假。（記：最高工時？）冇60㗎啦，因為我哋希望44，跟住補假呀。（記：拉布一定過60小時啦！）咁忙起上嚟，大家都冇計嘅……哈哈哈哈，未必有60嘅，用補假去解決囉。
記者：雷子樂 張嘉雯
攝影：張志華