根據瑪雅曆法預言，今個月21號就係世界末日，估唔到喺倒數緊嘅呢一刻，阿Wow仲打緊稿。唉，冇辦法，要搵食吖嘛，陣間死唔去，咪又要捱世界？其實耐唔耐都有傳世界末日㗎啦，當年千禧年將至，就有唔少人對千年蟲同末日恐慌，環保支持者盧冠廷就深信不疑。
事件發生喺99年6月，盧冠廷話千年蟲會攻擊電腦系統，仲會令核彈導彈橫飛，造成mass destruction。盧冠廷梗係唔會坐以待斃啦，佢一早有晒避難方案，就係喺馬來西亞沙巴搵「伊甸園」避難，仲同老婆唐書琛去嗰邊視察環境，又印埋一叠叠厚過本書嘅末日資料同其他人講解同分析，提醒佢哋走佬。搞咗一大輪，最後冇事發生過。雖然係咁，盧冠廷對環保嘅狂熱冇減退，佢00年喺西貢經營綠色生活專門店，專賣有機物品，全力推廣環保訊息。對於今年嘅末日論，盧冠廷噚日透過助手唱反調話：「我係唔信嘅。」
撰文：阿Wow
