話咁快12月差不多過了一半，老樓已進入放假心情，但對於一班地產從業員來說，呢個聖誕實在太冷，有些老友捱唔到寒凍，遭公司被迫放假，準備休息兩個月在農曆新年後才出山。
經常說做地產代理呢一行「唔怕牛市、唔怕熊市，最怕牛皮市」，呢期應驗晒。
今年第三季大行才說加人加行，這句話說不到半年便被政府打沉。做呢行真係冇得賴地硬嘅，即使最旺市嘅時候亦有一半人冇單開，地產代理慣性積穀防饑，最緊要還是仲有個牌，早排代理街頭武鬥隨時被監管機構吊銷牌照，第二日個市返嚟嘅時候，都冇仇報。
做地產代理浮生若夢，今日唔知聽日事，山大斬埋有柴，因此連車位都照殺，有單開總好過坐冷板凳。
同經紀黃講起，其實最近唔少過江龍為咗啖氣，認為政府歧視外國客，用公司買樓要畀多樓價15%買家印花稅（BSD），覺得政府一刀切措施，實情係趕客，不如去其他地方買樓，反而歐美市場正處於谷底反彈狀態，部份買樓收租的外國人士轉購當地豪宅，起碼價廉物美，也可博樓價反彈，「輸極都唔會輸到入肉」。
逆市求存 變則通
老樓亦發現了外地發展商捉摸到這買家需求轉變，近日多了歐美樓來港展銷，或許本地代理商冇生意做，逆市求存都會改變吓，捱得一時兩日都好。近期來港展銷的包括英國、澳洲和西班牙樓盤，樓價每平方呎6000元至10000元（港元．下同）之間，位於澳洲墨爾本嘅樓盤一房單位近300萬元，老樓並不熟悉當地樓市，反正讓有閒錢的人士多一個選擇。
而且內地打擊房地產不遺餘力，內地熱錢總是喜歡買樓多過買股，對這類發達國家的物業不排除亦有濃厚興趣，來港展銷同樣把目標鎖定這班強國人士。
劉兆昌
資深地產傳媒人
mailto: http://www.HKLau.com