曾志偉噚日喺澳門威尼斯人酒店出席亞太影展拜神儀式，問志偉有傳黃浩去警署就被掌摑一事銷案，佢話：「咪好囉，件事完結咗有個句號，因為炒作咗好耐又牽涉太多人，最唔好係涉及小朋友同家庭。家了解咗，是非明白晒應該告一段落。」志偉話想飯局短片快啲流出：「如果真實嘅冇所謂，應該盡快，唔好拖拉，有咁多傳言出現，我覺得係因為報道太多，又有一兩篇胡亂報道至搞成咁。」
黃浩出巡續封口
黃浩噚日3點鐘坐車離開大埔寓所，由黑人保鑣陪同去咗尖沙嘴美麗華酒店，佢唔肯回應係咪去過警署銷案，繼續封口乜都唔講，黃浩喺夜晚6點幾離開酒店，繼續冇回應記者提問。但據知台灣花雕雞總店方面已派咗人嚟香港，前晚仲同黃浩開會，目前正考慮下周會有反擊行動。
另外，飯局發起人陳維尊嘅男友LMF成員李健宏，前晚喺尖沙嘴做小肥祝捷會嘅鼓手，佢見到記者時好避忌，仲拉起件衫遮樣。佢接受訪問時話冇嘢補充，又強調徐濠縈已代表佢嘅立場。有指女友同阿徐被警方邀請提供資料，阿徐就強調係報案，李健宏回應話：「佢哋講嘅就係事實，已經代表我哋，唔再講太多。」
撰文：馮仁昭
