【萬千星輝頒獎典禮之男主角篇】無綫《萬千星輝頒獎典禮》後日舉行，在一人一票的制度下，擁龐大fans群的林峯有絕對優勢，至於實力派演員黎耀祥和陳豪陪跑居多。不過世事難料，馬國明先在大馬封視帝攞頭彩，其後又有網民在討論區發起配票行動，令賽果增添變數。在TVB捱了13年的馬國明，機會就在眼前，他坦言渴望攞獎，因為對搵食都幫到手！
撰文：何慧斯
馬國明（馬明）早前憑無綫劇《On Call 36小時》中張一健一角，在大馬首度封視帝，入行13年的他演過不少劇集，直至《On Call》的出現成為他事業上的轉捩點。馬明直言今年是工作最順暢和大豐收的一年，不過談到在無綫頒獎禮稱帝的信心，馬明說：「今年一人一票真係難講，我唔敢講多咗信心，但我相信呢個獎可能會remind番啲觀眾有呢套劇，始終有幫助，某程度上都可以當台慶拉票，咪當係宣傳囉，今年嘅賽制唔同，對阿峯係有着數，佢拍戲同唱歌都會有好多fans，祥仔（黎耀祥）嘅《大太監》又喺近台慶嘅日子播，未到最後一刻都唔知結果。」
外闖拍電影
馬明續說：「坦白講，如果畀我攞個我最喜愛的電視男角色已經覺得好開心，對於我嚟講獎項係無分大細，係一個鼓勵，攞到獎，啲廣告商做活動又會多啲，對搵食都幫到手。如果攞唔到咪戥人開心，又唔會失望，始終我喺大馬叫做攞咗個獎。」
曾經有不少前輩講過，要10年才會培育出小生，如今機會出現眼前，馬明當然努力把握，令演藝事業更上一層樓，他說：「係㗎，我會鞭策自己要繼續進步，仲訂立咗計劃，某程度上都有同公司反映過，嚟緊會有啲轉變，會加倍努力。」馬明口中的計劃是甚麼？他說：「我希望出年可以出去拍嘢，我唔咁着眼喺內地，呢啲係睇機會，反而想試吓拍電影，試吓拍無綫以外嘅嘢。」
「觀眾識睇劇」
雖然近年不少無綫的當家小生花旦紛紛雙線發展，拍劇又唱歌，但馬明直言興趣不大，他笑說：「唱歌唔會諗，以前有人試過搵我做遊戲節目主持，呢啲都唔係我專長，我只係單純想做戲，當然登台係無任歡迎，登台冇壓力，台下觀眾想見你個樣多過留意你嘅歌藝。」他還說：「我反而恨有個好劇本，家啲觀眾好識得睇劇，自然對你要求越嚟越多，可能我冇包袱，所以喺角色方面冇乜限制，只要敢畀我做就會無任歡迎。」
最佳男主角提名名單
黎耀祥
《大太監》
陳 豪
《天梯》
鄭嘉穎
《拳王》
林 峯
《雷霆掃毒》
馬國明
《On Call 36小時》
黃宗澤
《護花危情》
郭晉安
《東西宮略》
劉松仁
《名媛望族》
馬德鐘
《飛虎》
黃浩然
《拳王》