卓佳佳不愛流淚，今年卻為新界東北哭過兩次，作為粉嶺北農村及居民聯席成員，過去半年代表村民發言，反對東北規劃，與政府、鄉事派及地產商抗爭，這個自小霸道寸嘴的家中孻女自嘲：「我已經夠霸道，政府同地產商仲霸道過我！」
撰文：蔡俊業 攝影：楊錦文
因感動而哭
今年初秋最後一場新界東北新發展區諮詢會後翌日，在報章見到卓佳佳的哭臉，當事人坦言之所以哭，既因驚慌也因感動。
話說當時反對規劃的東北三區居民組成了白衣黨，與支持發展穿上印有「上水鄉」字樣的藍衣原居民在諮詢會場各據一方，兩幫人起爭執，繼而動武，傳媒舉機包圍，場面混亂。男人打架理應避之則吉，她竟上前勸交，結果遭人推撞，身體多處紅腫，鏡頭就在此時捕捉到她哭，「你都知我得罪人多啦，又見到藍色衫班人癲到用大聲公扑人，所以有村民就跟尾傍住我，其實我只係俾人撞紅少少，但有村民即刻撲出嚟救我，開條路畀我走，嗰刻真係好感動。」
她口中得罪的人，是新界東北發展既得利益者，尤以「賠夠錢祠堂都可以畀埋你」的上水鄉事委員會主席侯志強最不客氣，早前他接受《iMoney》訪問便曾點名批評卓佳佳：「渾水摸魚，搞破壞！」面對阿叔公開挑機，死妹釘只說：「渾水摸魚？摸乜魚？搞乜破壞？我反對新界東北新發展區，唔代表我反對政府收購土地。」她和侯志強非首次交手，有次在已停播的DBC數碼電台《十級自由Phone》節目中，二人隔空比劍，那日她剛完成活動，坐在商場某處，用電話接招，「佢話我賠償，我話政府係有政策，要符合條件先有錢賠，佢根本無心同你講道理，我覺得好嬲好委屈，嗰陣但得我一個，好無助，中間播廣告時間忍唔住喊。」那就是第一次為東北事件而哭，既因疲累，也因沒想過幫助村民討回公道會遭人抹黑，這是她踏進凶險成人世界後上過的最重要一課。
批判種子的萌芽
卓佳佳生長在五女一子的大家庭，她是孻女，父母奉行自由管教政策，造就她霸道性格，「細個我由阿嫲照顧，佢淨係識講福建話，我只係識講少少，一有語言不通我就發脾氣，所以嫲嫲叫我做小魔怪。」猶記得小學某年，卓家上下看電視見證楊千嬅憑《少女的祈禱》奪金曲金獎，卓佳佳因身邊很多同學迷楊千嬅，拍手說好，大家姐卻唱反調，「佢話：『嘩！佢首《抬起我的頭來》勁難聽囉，點解會係佢攞獎㗎？』嗰刻開始我就知道，好多人覺得好嘅嘢其實未必一定好，唔同人有唔同諗法。」
批判思考像種子在腦袋播種，西貢鄭植之中學的幾位好老師，更令種子茁壯成長，「讀初中，老師已經講六四，又會分析事件，當然對成件事無深究，但會得出一個結論，世界上有個Term叫『社會公義』。」中三那年，老師甚至帶她們去天安門母親的義賣手錶攤檔當義工，那時她仍覺得自己只是旁觀者，直到會考至高考那三年，遇上保育浪潮，天星、皇后、利東街，由媒體報道到親身了解，示威、抗議、留守的畫面看在眼裏，漸漸令她想通一點，「開始明白城市發展並唔係一條康莊大道，亦唔係好公平。政府講好多年嘅獅子山精神，就係想我哋相信，每個人都會隨住社會階梯向上流動，但無話畀你知嘅係，拆舊建新過程中，舊時住喺度嘅嗰班人會Displace。」高考憑地理、歷史及中化奪3B成績，首選港大社會學系，最終獲派第三志願浸大地理學系，她最初失望過，今天知道是命中注定，「當年老師話讀唔同科會成為唔同人，我覺得你係邊種人就會讀乜嘢科，好似冥冥中有塊磁石吸你埋去，我唔覺意入呢科，暗地裏其實符合一路以來我想知或者有興趣嘅事。」
你破壞我建設
卓佳佳對法國社會及哲學家列菲伏爾（Henri Lefebvre）的「城市權」（Right to the city）理論非常深刻，「對於城市規劃，人應該有參與同發言權，之所以成日詬病政府，係因為所有政策都係以Top-Down邏輯去規劃，永遠唔係以Bottom-Up，即由社區需要呢個點出發，所以先會發生咁多事。」受理論洗禮，大學三年級時她決定身體力行，先參加菜園村導賞團，再加入反高鐵運動，幫手做街站，又支援反高鐵苦行，「唔係完全否定高鐵用途，但代價真係太大，係咪真係要拆菜園村去擺個救護站？係咪真係要用六百幾億去起，最後可能得一半香港人用到？咁樣好Global？你講到咁威，不如同太空融合啦。」
就在反高鐵前，她應組織邀請到上水天平山村參觀貨櫃場，令她之後走上反對新界東北發展運動前線。「呢次係我第一次喺香港見到農田。」她發現村民數十年來一直以耕住合一方式過活，「成個城市發展故事中，從來都無香港農村故事出現，所以好想將呢部份講畀大家知，諗吓點樣可以幫到呢個地方。」同年底，她在第二次新界東北發展區公眾諮詢會上，認識了泣不成聲的區晞旻，區家三代在馬屎埔村務農，開發新界東北無異拆散家園，只好四處求助。自此，卓佳佳與她成為反新界東北發展的戰友，聯同其他志同道合，希望為村民做點事。2010年夏天，她們在馬屎埔村開辦「馬寶寶社區農場」，實行有機耕作、舉辦農墟、農村導賞、食物工作坊、觀賞青蛙及螢火蟲等生態活動，另一邊聯袂村民堅持耕作，「好似馬寶寶咁，種菜之外亦幫助消耗城市廚餘，如果無晒農田，無論你有N部廚餘機、幾多個廚餘中心都無用。」她冀望身體力行能夠感動周邊居民，連結區內力量，「你有你破壞，我有我建設！」
當香港人白癡
建設尚未成功，政府依舊以「香港急需土地應付住屋問題」作辯解，沒打算撤回發展計劃，佳佳以數字戳穿謊言。「政府話東北三區住宅用地有167公頃，但全港長期有四千公頃土地Hea喺度，包括平租畀人開高爾夫球場同停車場嘅地方，如果規劃呢啲地方做住宅用途，就足足有2,100公頃，呢啲數字係麥齊光上任後唔覺意畀咗立法會，如果政府真係有誠意解決住屋問題，你用當中十分一已經夠晒，做乜要起三個新市鎮？你就知道背後有好多Agenda同計算。」還有地產商收購農田得來的土地儲備，以粉嶺北的馬屎埔村、石湖新村及天平山村為例，就由恒基、新世界及新鴻基三家地產商瓜分，「香港人口增長不斷放緩，已經唔再似六七十年代咁倍數增長，我覺得呢個計劃係配合地產商賺錢。」
邊說邊回到農田，這個溫婉少女充當導賞員，帶我們參觀馬屎埔村，路經種滿沙律菜的田，難掩興奮：「哎~呀！好靚呀！」沿路遇到的村民，她都說得出名字，這些都是新聞及廣告無法呈現的畫面。「有人鍾意做律師，有人鍾意做農夫，最緊要係有得揀，偏偏香港就係唔畀你揀，個個跟住地產商標準去做，好變態！」問她為何當上發言人，她說：「為村民爭取權益，說話要慬慎小心，所以大家先叫我擔任代言人，企喺傳媒面前，抗爭背後仲有好多人一齊努力。」說到那兩輯「新界東北新發展區」宣傳片，她認為內容不講幾多幢樓、不說用多少公帑，已反映政府棄用理據說服市民，轉移推銷溫情和願景，「直情當香港人白癡。」早前她拉大隊到通訊局投訴，「件事仲討論緊，咁快宣傳係唔公平，最搞笑係政府廣告唔受《廣播條例》規管。得罪講句，香港都有唔少蠢人，但有正常思考能力嘅人，都會覺得條宣傳片討厭。」
