【跑馬地成和道】歐陽震華（Bobby）過往演過唔少角色，但佢似乎對《施公奇案》情有獨鍾，如果唔係佢都唔會特登出部車係「C KUNG」車牌。前日下晝4點幾，記者見Bobby揸部C KUNG車牌嘅日產七人車去跑馬地成和道停車場，根據車輛登記資料顯示，呢部車係Bobby舊年以大約14萬買番嚟嘅二手車，但平時就唔多覺佢揸呢部車出入。
慳家好男人
戴住冷帽同黑超嘅Bobby，落車之後行咗上去藍塘道一住宅大廈，但唔夠半個鐘又落番嚟，期間佢見到街邊有咪錶位，於是特登去停車場揸番部七人車泊喺錶位度，估唔到佢都好知慳識儉。泊完車之後，Bobby行咗去附近睇醫生。大概15分鐘之後，Bobby離開診所，但奇怪佢手上唔見攞住藥，之後Bobby揸車離開時見到記者，仲特登開窗揮手打招呼，心情似乎唔錯。
原來Bobby前日去跑馬地睇醫生唔係因為病，而係出現咗意外要搵西醫幫忙，佢噚日喺電話度話：「我沖完涼用棉花棒清潔耳仔，點知嚿棉花塞咗喺耳仔整唔番出嚟，所以咪去搵西醫幫我整番出嚟囉。」
採訪、攝影：羅德光、黃曉程
