後生仔初出茅廬，人工稍低，物價又高，就算儲夠首期買樓，可能樓價又幾番新。有些實力堅挺的父母，幫子女付首期上車，何樂而不為？但卻惹來嫉妒或批評，有子女甚至嫌棄父母只買上車盤。不過，由名人薛家燕，到升斗市民黃先生、張太，他們都是幫子女置業的廿四孝父母，除了愛子心切，說到底也是希望把子女留在身邊！
記者：陳家雄
【Story 1】
薛家燕
職業：藝人
子女：一名兒子兩名女兒
「仔女有私人空間」
一梯三伙 一人一伙
薛家燕篤信風水，搵風水佬算過，決定紮根港島西半山。走過人生低潮，1996年復出拍戲，同年買入西半山殷樺花園一個中層單位，後來憑長篇連續劇《真情》的「好姨」角色叫好叫座，99年多買入一個同屋苑單位。多年來順風順水，堅信這裏就是風水屋，2009年又再買多一伙，她自爆，這三個單位都在同一層。這個「一梯三伙」計劃，原來十多年前已未雨綢繆，目的是讓三個子女，一人一間屋，他朝各自有頭家，子女都可以住在身邊。
等咗十幾年 可遇不可求
她相信物業最保值，「十幾年前，已經決定要為仔女買樓，因為股票、基金好唔穩陣，可以一下子就冇晒。買磚頭就唔同，始終有件實物，又保值，好彩嘅話，仲會升值。到他們長大後，有需要時，隨時攞間去住。」
「我有三個仔女，所以最少要買三層樓，一人一間……（買齊了嗎？）買咗啦！三間都在同一層。哈哈……家好似唔係一齊住，但又係一齊住咁，好矛盾呀呵！嗯……點講呢，可以一人住一間，佢哋有私人空間，有時出咗街，我都唔知。但行過隔籬就一齊食飯、飲湯，有時我又可以拎啲湯過去，互相照應，幾方便！」
談到如何買入三個同層單位，正在吃飯的家燕姐，即時興致勃勃，急不及待分享：「哈哈……真是可遇不可求！」含住啖飯繼續講：「嗯……不過咁喎，我都等咗十幾年先買到，真係要好有耐性。」她說，不能逼人家賣樓，惟有苦等，「一早同經紀講，如果我隔籬個單位放盤，就通知我。」殊不知，三年前，同層C室業主主動聯絡她，問家燕姐有無興趣買入，沒有開天殺價，最終以830萬元成交。
家庭照片由被訪者提供
「如果唔鍾意，仲有得揀」
對於父母買樓給子女，社會上有不同意見，有理財專家認為寵壞子女，阻礙事業發展。家燕姐就話：「其實仔女都唔想靠我，想靠自己能力買樓，我只係以備不時之需。總之，樓就預咗喺度，如果唔鍾意，我仲有其他物業可以畀佢哋揀。（如果都唔鍾意？）嗯，都係港島區喎，交通方便，唔會唔鍾意啩？」況且大女和二仔已經入住三年前買入的單位，物業只是作簡單裝修。
她又說：「有錢，唔怕買樓呀！十幾年前我供樓，十幾厘息，頭幾年幾乎只是供利息，但幾年前我買樓，只係一厘幾息咋！反正買咗樓，唔住嘅，咪租出去先囉。」
可是單位各有優劣，要是未來媳婦鍾情海景，會否掀起爭執？「海景？我住緊喎！」聽風水佬講，向海單位有利她事業，所以家燕姐會繼續住在海景單位，至於單位如何分配，她就沒好氣了，「總之，三個仔女，一人都有一層樓。」
一人一層樓！小記都想叫聲「家燕媽媽」！
單位照片來源：《壹週刊》
【Story 2】
黃先生
職業：退休警察
子女：兩名兒子
兩子成家立室
退休警豪畀五成首期
黃先生是退休警察，經歷三十多年陀槍生涯，一家四口在黃大仙下邨生活，數年前細仔率先成家立室，公屋單位不夠住，由於細仔人工低，樓價又高居不下，於是一擲千金替兒子買入鄰近住所的龍蟠苑。今年到大仔拉埋天窗，絕無偏心下，同樣付出五成首期，購入樂富天馬苑助大仔上車。
好明白「相見好同住難」
「結婚擺酒都係錢，我問阿仔，使唔使老竇幫你畀首期呀？佢哋話，當然求之不得。」黃先生不願出鏡，僅接受電話訪問，他解釋：「我出鏡冇所謂，但係怕阿仔朋友認得出我，知道原來係我幫佢哋畀首期，如果佢同朋友講，買樓冇靠老竇，咁樣自己篤爆自己，佢好瘀㗎！」
黃先生續稱：「我唔係晒命，有乜命好晒呀？不過區區二百零萬嘅上車盤，之所以肯睬你（記者），係因為我好想講，我經歷過做仔時代，得閒約老爺奶奶食飯飲茶，冇問題呀！但係相見好同住難呢個問題，我好明白，亦好感慨，二人世界，總有佢嘅好處。」
搵幾萬「幾時先儲到？」
「家後生仔出嚟做嘢一個月搵得幾多吖？兩萬蚊好未？加埋女友，三萬幾蚊，幾時先儲到首期？唔使食，唔使着咩？要是掹掹緊，畀得一成首期，你估之後唔會加息咩？如果租樓，就等如幫人供樓，錢又儲唔到。如果若干年後，有了小朋友怎算呢？」
所謂「無仇不成父子」，既然自己有能力，沒理由不幫兒子，有時自己也想想：「幫得到兒子是自己的福氣！」於是替他付了五成首期，餘款由他們自己負責，月供只是6000元，輕輕鬆鬆，可以擔起自己頭家。最緊要兩個仔行路返娘家都不消10分鐘，閒時回家飲碗湯，分支家庭又不會太疏離。
【Story 3】
張太
職業：家庭主婦
子女：三名兒子
大埔密密買樓收租
留給愛兒的愛巢
張太一家五口住大埔公屋，多年來節衣縮食，養育三名兒子，近年大仔、二仔逐個結婚，算是老懷安慰，陸續收回早年買入的物業，給兒子作為安樂窩。
「想一家人齊齊整整」
張太多年前以百多萬元購入太湖花園一個單位，然後放租，她說：「當年老公退休，揸住筆退休金，唔知點用，咪買樓囉。」揀太湖花園，因屋苑具規模，又近住所，方便收租。直到2006年，大仔計劃結婚，「佢話想去市區買樓，我話唔使啦，收番層樓畀你住……老實講，我唔想個仔住得咁遠，雖然香港交通方便，得閒可以返來，但來來回回好辛苦。大仔好生性，好叻仔，唔使我幫，但我想佢住近自己，最後佢聽話，肯住嗰個單位，仲畀咗嚿錢我，當係同我買，餘款由佢供。」
接着張太把大仔給他的一筆錢拿去再買樓，「都係為兩個細仔做打算，睇嚟二仔和細仔將來娶老婆後，都唔會同我住㗎啦！家啲後生都係咁。不過錢唔算多，要揀啲200萬以下嘅細單位，當時呢頭有唔少選擇，最後揀明雅苑。」由於利息低，付一成首期，最後買入兩個單位，沿用一貫做法，先租給別人，需要時收回。
沒料到去年二仔又趕住結婚，「都係咁啦，我話明雅苑個單位，係留畀你嘅！不如收番，你自己供。佢話冇所謂，但就講明如果將來有小朋友，可能唔夠住，問我可唔可以到時賣走換樓，我話明畀得佢，佢鍾意點就點啦。」至於餘下一個單位就仍然出租，她微笑道：「希望細仔將來用得着。」
丈夫幾年前逝世，現在和細仔住在公屋，「買樓畀佢哋，無非想一家人齊齊整整，如果一個住港島，一個住九龍，好唔方便，家咁樣幾好，住喺附近，有事都有個照應。」
父母幫子女買樓要求
(1) 主要是舊樓、居屋或大型屋苑
(2) 入場費通常200萬至300萬元
(3) 首期通常付30%或50%，務求減輕每月負擔
(4) 以兩房單位為主
(5) 未必需要有齊傢俬的單位，但最好四正企理，不用花費裝修
(6) 樓層、景觀其次，單位實用最要緊
(7) 一家人住在同一區域