【隔牆對論】
勞資角力沒完沒了，最新戰場在標準工時。自由黨張宇人指中小企至今仍未「捱過」最低工資的風浪，形容標準工時的殺傷力遠超最低工資，「好似地溝油咁，短期睇唔到個影響，但就傷你嘅腸、傷你嘅肝，到你睇到嗰陣已經太遲，啲投資者已經走晒」。
記：《蘋果》記者 張：張宇人
政府報告指，香港已實施最低工資，再推行標準工時或會過度影響香港勞工的靈活性和營商環境。最低工資和標準工時「有其一，不一定要有其二」。
記：你對標準工時的立場是？
張：標準工時嘅殺傷力一定遠超過最低工資，呢一浪最低工資嘅影響都未消化，漣漪效應仲持續緊，個巿一逆轉，惡果就會出現，對中小企老闆嚟講係百害而無一利；對員工有利有弊，有工做嘅咪着數囉，年紀大就搵唔到嘢做。你硬性規定咗條線，令個巿場失衡，好似地溝油咁，短期睇唔到個影響，但就傷你嘅腸、傷你嘅肝，到你睇到嗰陣已經太遲，啲投資者已經走晒。
根據報告統計，在全球107個受訪國家中，101個國家設有法定工時限制，當中包括11個亞洲國家。
記：標準工時是大勢所趨，香港不推行是否落後於人？香港商家是否經營效率低，透過剝削勞工來賺取利潤？
張：好多國家推標準工時係因為當地失業率高，想藉呢樣嘢嚟降低個失業率，香港長期失業率偏低，根本唔需要咁做；香港唔同其他國家，淨係得人力資源，香港有冇資格好似美國咁不停印銀紙吖？係咪成日要求北京放水呢？美國、英國、法國好想返轉頭呀，但返唔到吖嘛，個經濟咪吊鹽水囉。你睇吓家咁多國家搞咁多豁免，我哋未立法咪就唔好立囉。我唔信香港嘅員工會被人剝削，東家唔打咪打西家囉，你夾硬降低個工時，佢搵唔夠咪又係要駁第二份工。好似洗碗咁，淨係請你做幾個鐘，時薪制，到時變咗周圍做4個鐘，變咗跨區8個鐘，甚至跨區做夠12個鐘囉。
報告指出，受訪國家中，41％採納40小時工作周，另有22％國家規定每周工作48小時。此外，南韓少於5名僱員的中小企可豁免受工時法例規管，亦可按規模分階段實施標準工時。
記：標準工時定在哪個標準可以接受？若香港仿效南韓的做法，在不同工種或行業作出豁免，是否可以接受？
張：底線？我覺得冇一個標準係合理㗎喎，我支持巿場自由調節，我唔知佢成個條例點立，你一日唔講行業豁免，可唔可以opt-out，咁點講呀？淨係計飲食業，工資等於生意額3成有多，一般要做60小時，如果你計44個鐘，咁多咗嗰16個鐘乘工半，當28蚊個鐘，個成本都已經多咗百分之2、3，都未計最低工資加到30蚊。
記：你請議員助理，做到標準工時嗎？
張：我從來冇水補畀佢哋，公唔公道我唔知，好似議員拉布咁，我同事同我坐到11點幾都冇補水，因為佢知道呢個係佢嘅責任嚟，佢哋可以補返假，但都冇特別mark低，僱主好多嘢可以做補償，各師各法，淨係講補唔補水，公唔公道呀？
記：過去自由黨曾經預測一旦實施最低工資28元，將有4萬6千人失業，結果失業率不升反跌，你怎樣解釋？
張：我唔會代自由黨答，亦都唔知自由黨講咗咩，你去問返自由黨。我呢度唯一可以講嘅係，唔好諗住個經濟永遠都維持喺咁嘅水平，如果有金融海嘯咁點？好多嘢當時係唔知嘅，財爺自己都唔知會派6,000蚊，呢啲錢有幾多係流入咗飲食業度。
記者：雷子樂 張嘉雯
攝影：張志華