【萬千星輝頒獎典禮之飛躍進步男藝員篇】無綫《萬千星輝頒獎典禮》後日舉行，在一人一票的制度下，今年最佳男配角獎已是古明華和陳國邦之爭，蕭正楠和梁烈唯早打定輸數，轉攻飛躍進步男藝員獎。事實上兩人的最大進步並非演技，而是待人處世。前者年少輕狂，經歷過潦倒落泊歲月，終悟出默默耕耘道理，由發霉奀星蛻變成男主角；後者辛勞十載，終於由寄人籬下到擁有自己的家。得獎與否，又有何干？
撰文：楊潔雯
想當初蕭正楠是個年少輕狂的乞人憎男歌手，之後被迫到北京搵食，五年前身上帶有一點點土味的他，跟女友分手，放棄京城的安居樂業，決意回流返港，從頭做起。
視黎耀祥為師傅
一開始被視為四線奀星，經過歲月的洗禮，人大了，成熟了，任勞任怨的工作態度，得到不少監製賞識，五年後，蕭正楠躍升為男主角，以累進制計算，今年「飛躍進步男藝員」獎，應該是他的囊中物，他說：「我師傅黎耀祥當年拍《巾幗》開始氣勢如虹，記得我上前恭喜話佢好勁，但係佢仍然好淡然咁話：『當然你咁講我好開心，你話我係高峯，其實我可以有好多個高峯，只係期望太多，嗰啲嘢係唔會嚟搵你，放低啲嘢又會返埋嚟。』佢當年本住平常嘅心情面對，成功過渡，之後佢仲連攞兩年，紅到家。所以學師傅話齋，好多嘢都唔好太緊張，不過，我都要好多謝珍姐（曾勵珍）咁信我，返嚟五年可以畀個男主角我做，嗰時聽到呢個消息我都好驚訝。」
應該在橫店的某一天，蕭正楠突然開竅，過去的經歷和現在的機會，對他來說，一切都是美好的，他說：「拍《大太監》嗰時，我哋五虎感情特別好，喺橫店拍外景冇工開都可以坐喺茶餐廳傾足成個下晝，嗰時每個人都會講吓自己經歷，當我聽到師傅嘅經歷，我嗰啲根本就微不足道喇！既然係微不足道，又何須再提。努力做好下一部，咁多時間緬懷，不如做好家，到時咪冇人冷眼睇你囉！所以我係要將自己啲戲做好啲，對所有獎項，我都要保持平常心。不過，呢幾年我真係好開心，雖然初頭返嚟香港感覺好陌生，但係家喺街度會有人走埋嚟叫我劇裏面個名，搵我影相，係好開心。」
撐陳國邦爭好戲
至於「最佳男配角」蕭正楠亦榜上有名，過往一年他有份參與演出的劇集有四部，而蕭正楠憑《當旺爸爸》獲提名，但是眾所周知，男配角比男主角競爭更劇烈，論年資，講演技，蕭正楠全力支持《大太監》五虎之一的好兄弟陳國邦，他說：「阿邦好評如潮，佢有得提名男配角真係好開心，佢呢幾十年一直都係咁用心用力，反而得唔到觀眾認同，不過佢生咗個女之後，成個變晒，好有生氣，講起個女開籠雀咁，佢個女真係好腳頭，家佢有觀眾緣同運氣，加上努力，好希望佢可以攞到個獎！」
最佳男配角提名名單
《缺宅男女》
梁烈唯
《On Call 36小時》
羅仲謙
《當旺爸爸》
蕭正楠
《護花危情》
蔣志光
《怒火街頭2》
林子善
《巴不得媽媽…》
古明華
《天梯》
黃德斌
《名媛望族》
王浩信
《大太監》
陳國邦
《大太監》
岳 華
飛躍進步男藝員提名名單
王浩信
金 剛
梁烈唯
蕭正楠
羅仲謙
