【萬千星輝頒獎典禮之飛躍進步女藝員篇】每逢頒獎禮，大家聽得最多的肯定係「有提名已很高興，係一種肯定」，有幾多人夠膽講自己恨攞獎？今年飛躍進步女藝員之爭也不例外，兩大宅男女神苟芸慧、岑麗香，再加黑馬黃智雯、樂瞳，的確爭持激烈，未到最後一刻都勝負難分。不過正所謂輸人唔輸陣，幾位靚女爭獎之餘，近日也搜羅靚衫在決戰當日爭艷鬥麗，實行台上明爭台下暗鬥。
撰文：王崇穎
今年憑劇集《巴不得媽媽…》彈出的岑麗香果然氣勢逼人，單以一劇已有飛躍進步女藝員、最佳女配角、我最喜愛電視女角色三項提名，成為最多提名的女演員，撼贏眾花旦，首次擔正拍劇就有如此佳績，香香對於即將舉行的頒獎禮亦不敢怠慢，邀得名設計師Dorian Ho為她親自度身訂做戰衣，香香穿上低胸性感晚裝，依然予人甜美性感的感覺，難怪被網民力捧成新一代女神。
壓力大匿埋喊
劇中香香公主一角如此成功，香香坦言從未想過，當時只想專心拍劇，做好本份，故播映後有如此大迴響，亦令她始料不及。香香感謝fans支持：「今年嘅成績真係令我好開心，好滿足，咁多觀眾接受我，但我相信仲有好多進步空間，家有提名已經好開心，仲要有三個提名，我都好驚訝。」問到特別想奪哪個獎？她謙虛表示有提名已滿足：「真係要揀我會想攞飛躍進步女藝員，因為當係一個事業起步嘅好開始，即係仲需要好大嘅進步空間。 」
首次擔正拍劇的香香表示，拍攝時有笑有淚：「拍劇時好多時候都冇得瞓覺，又要背稿，初初真係冇諗過咁辛苦，有時亦都好唔滿意自己嘅表現，積咗好多壓力，都會偷偷匿喺屋企喊，好多前輩都安慰我，話呢種感覺係正常嘅，叫我唔好唔開心，所以我最後都係交畀神，不過劇集出街後有咁大迴響令我有好大滿足感。」
香香今次成績理想，她坦言往後拍劇壓力更大：「當然會好大壓力，今次反應太好喇，加上因為呢個角色係做番自己，所以下一個角色就會係一種挑戰，因為做自己好易，做人哋就好難。」
不介意被比較
香香直言今年對手強勁，故未有太大信心，她直言十分欣賞黃智雯的表現：「我會欣賞其他演員，但唔會諗對方係對手，大家都係一齊努力去工作，即使最後人哋攞獎，我都係好開心。」對於經常與茍芸慧作比較，她稱絕不介意：「我知道好多人會將我哋比較，因為我哋兩個都係選美出身，但我哋本身都係好朋友，總之我哋本身冇呢啲比較就OK。」
飛躍進步女藝員提名名單
岑麗香：《怒火街頭2》、《巴不得媽媽…》、《黑龍江》
苟芸慧：《怒火街頭2》、《飛虎》
黃智雯：《缺宅男女》、《On Call 36小時》、《飛虎》、《巴不得媽媽…》
樂 瞳：《回到三國》、《當旺爸爸》、《護花危情》
龔嘉欣：《我的如意狼君》、《拳王》、《衝呀！瘦薪兵團》、《天梯》、《更上一層樓》