憑《缺宅男女》關二哥的成功，梁烈唯不單名利雙收，更在下周一（17日）舉行的台慶頒獎禮上，獲提名最佳男配角和飛躍進步男藝人，事實上唯唯曾經在08年獲提名飛躍男，結果被王祖藍擊敗。事別三日，刮目相看，如今唯唯再度披甲上陣，實在比當年勇猛得多。
《飛虎》振雄風
談到今年再被提名，唯唯說：「唔可以話預咗，只係覺得機會好大，《缺宅》係喺年頭播，當時都會覺得慘，到年尾觀眾實會唔記得晒，都有啲擔憂。好彩中間有兩套古裝，迴響未必好大，不過有人記得角色叫乜名，直到《飛虎》呢個咁man嘅大男孩角色，大家好似未見過。」他續說：「今年係幾好嘅一年，除咗演員工作外，台慶跳舞、唱歌都有試過，時間配合好好，我覺得自己信心OK，天時地利都有，係睇人和。」
入行超過十年，拍過電影和電視，經歷過人生高低起跌，笑稱唯唯終於捱到，他笑說：「其實我又唔係覺得好捱，呢九年喺TVB係不斷學習，無可否認今年出咗《缺宅》同《飛虎》之後，生活又確實係舒服咗，工作量多咗、又加咗人工，家可以有自己個家，我啱啱喺溫州做完嘢，坐車嗰陣突然間諗起，我好耐之前拍大閘蟹廣告，好似係04、05年，嗰陣仲未有自己個家，住喺女友同契媽屋企，但係今次坐車返嚟，可以車到你自己屋企門口，嗰刻真係好感動，終於有自己間屋。」他更說：「如果你問我，我覺得算好好彩，十個有八個都好努力，呢行最重要係人哋畀機會，雖然未致於話好好，但係從來都無缺乏，真係比上不足、比下有餘。」
男配角競爭大
唯唯直言寄望「飛躍男」多過「男配角」，皆因男配角的對手強勁，他笑說：「我當咗陳國邦係我老師，我成日請教佢，我哋一齊拍《大太監》，知道佢演繹得有幾好，一路keep住水準，佢真係滄海遺珠，今年應該係佢攞。我覺得男飛躍啱我啲身份，好似一個起步。」至於壓力方面，他坦言：「成日都有，尤其係瞓覺，日有所思、夜有所夢，有幾次發夢夢見頒獎禮，好緊張，可能好多朋友畀咗我鼓勵，話我好大機會，聽完之後已經叫自己唔好諗，但係不停係咁諗，話我冇諗係呃你，我成日覺得參加得梗想贏，參加比賽一定想贏，我係想攞，想唔一定會有，所以叫自己平常心面對。」
撰文：何慧斯