過往兩年入冬，旺角花園街均發生火災，如今北風初起，又到高危時。盧雪君在花園街打滾多年，飽經火煉，10歲學會劏雞，14歲當非法童工。
儘管向來滴酒不沾，18歲卻跑到太子酒吧街當侍應，從此與酒結下不解緣，更一度殺入蘭桂坊。八年過去，繞了一圈最終回歸旺角，今時今日她已貴為朗豪酒店首席調酒師，更摘下多個調酒師比賽桂冠，看誰還敢小覷MK妹？撰文：潘婉玲 攝影：胡堅
盧雪君的英文名Jackie取自偶像成龍，可知她硬淨，這跟她的身世不無關係。12歲與媽媽、弟弟從內地來港與父團聚，蝸居花園街僭建天台屋，「夏天會好熱，又冇錢開冷氣。我瞓上格床，好多次瞓瞓吓有隻老鼠跌落嚟，一手撥走佢繼續瞓！」現年26歲的她開誠布公，記者卻為之心驚，如此肌膚之親，縱是麻甩佬也「走夾唔唞」。
父母在他們來港後兩年離異，當時14歲的Jackie不忍媽媽日做兩份看更獨撐整頭家，訛稱15歲，既派傳單也當餐廳侍應。真正到15歲後，先後當過髮型屋助理、電話卡推銷員，賺了金錢卻賠了學業，會考捧蛋是意料中事，16歲回巢花園街，就在住所不遠的排檔當起售貨員。
曾在花園街排檔賣衫
「喂，其實我十年前已經見過報㗎！」她說的是2003年4月花園街大火，起火單位毗鄰其家，「大家走晒落樓下，反正唔返得去住，咪同幾個街坊去食早餐，哈哈！」記者期望她訴說辛酸童年時淌下兩滴淚，好讓攝記交差，最終不僅苦情欠奉，還送上燦爛笑容，她的生命力着實比老鼠還要頑強。
可憐媽媽趕返花園街火場，慌亂中連女兒年齡也搞錯了，問警察：「見唔見一個6歲女？」未幾母女重遇相擁，警察一看Jackie，問媽媽：「你個女唔係6歲咩？」
在花園街賣衫時滿腦子幻想，附近通菜街的酒吧究竟是怎生光景，一到成年便跑去當侍應，雖然從小見慣旺角的光怪陸離，夜場眾生相還是讓小妮子大開眼界，客人找她猜拳，「我話可以，但我輸咗只會飲水，試過有客話：『我要你飲水都飲到唔畀你去廁所！』」
打工的要「忍爆膀胱」，客人卻可隨處「放水」，「啲人飲大幾杯，最鍾意匿埋角位屙尿，男女都係咁，好多時見佢?褲鏈都已經拉開咗，女嘅仲準備踎低，我哋會即刻阻止」。經她手阻止的「好事」，又豈止小便，「有次我打開廁所門，見到一男一女喺度激吻，即時反應係道歉，仲幫佢哋閂埋門，突然醒起：『唔係喎，我喺度做㗎喎！』跟住又開番門請佢哋出嚟」。
侍應收拾爛攤子，躲在吧台內的調酒師卻可不問世事，繼續搖樽，對當時的Jackie來說很型，卻可望而不可即。「第一次聽到客人叫嘅係Bloody Mary，完全聽唔明，每隻雞尾酒都係英文，唔敢諗可以做到bartender（調酒師）」。就算偶有客人落單，英文酒名一律只記諧音。
一次夜蒲蘭桂坊，夜場Sugar（已結業）女調酒師的冷漠對待，教她暗自起誓：「對住男客鬼咁好人，好聲好氣，但轉過頭對住我哋幾個女仔就木口木面，啪一聲就放低杯嘢飲。我發誓，做到bartender一定唔會咁對啲客！」於是苦學調酒，從工聯會興趣班到專業課程，是賭氣還是發奮，她也說不準。
2008年，22歲的Jackie正式當上調酒師，兩年後「升呢」加入朗豪酒店，是酒店首位亦是唯一的女調酒師，滿以為飛上枝頭變鳳凰，卻因為酒吧侍應人手不足，被調到樓面當侍應，八個月裏一杯酒也沒弄過，慘被打回原形，挫敗感爆燈，「晚晚喊住返屋企，但我冇放棄，去咗新加坡訓練，我當自己放緊一個長假，畀自己好好休息，裝備自己」。
停薪留職學花式調酒
去年2月，Jackie重返調酒師位置，卻選擇停薪留職赴台三個月，學習花式調酒。機會從來只留給有準備的人，Jackie目前已奪得三個本地調酒賽冠軍。今年初更上一層樓，晉升為首席調酒師。
物換星移，Jackie早已從花園街搬到尖沙嘴居住，通菜街酒吧也由猜拳叫鬧走向高檔。相隔七年重回故地，望着曾經每晚駐足的位置，呷着曾經讓她卻步的Bloody Mary，雖然早已升呢，但小小酒吧裏的人情味，至今未能忘懷，「每年聖誕都好想返去，但過時過節，放咗工咁攰，只想返屋企瞓。」今年，祝你的聖誕願望成真。
