曹格出道數年已獲台灣金曲獎的最佳華語男歌手獎，為了超越自己，反而令他在創作上停滯不前，後來，曹格發現自己原來最適合做烏龜，才讓他尋回做音樂的快樂。
曹格推出新碟《荷里活的動物園》，在他眼中，這兩個地方充滿矛盾：「荷里活係充滿夢想地方，但亦將夢想徹底破碎，因為唔係人人都可以追尋到夢想。大家好開心買飛入去睇動物，但動物其實好可憐，一世俾人困住，所以凡事都有兩面睇，呢張碟我想表達呢樣嘢，希望刺激大家諗嘢。」
經歷起跌頓悟
在樂壇經歷起跌的曹格，坦言這兩年令他領悟良多：「以前日日努力工作，唔會停落嚟睇番自己行過嘅路。呢幾年改變好大，搵到自己舒服嘅腳步、方式喺娛樂圈生活，我以前比較急，家明白音樂唔係比賽，唔係爭獎，做音樂返到最初出發點，搵番當初鍾意寫歌嘅感覺，有自己方式做音樂。」
組樂隊尋開心
對於獎項，曹格坦言有當然好，但沒有亦不會改變他對寫歌的熱誠：「以前攞唔到獎，影響心情寫唔到歌，但攞獎要有運氣，天時地利人和，唔係努力就有回報，我唔想為攞獎做歌手，呢個唔適合我，我覺得自己家似烏龜，每行一步都好踏實，我都想咁做音樂，烏龜壽命長，就算唔可以一世唱歌，都希望可以一世寫歌。」
曹格謂自從組樂隊Sensation後，令他尋回做音樂的快樂：「之前一年寫唔到歌，因為寫歌有目的要hit song，呢個出發點唔啱，唔應該有太多包袱，所以家笑容都多好多。」
採訪：余燕儀
攝影：林德雄
一人一票投蘋果【萬千星虧】，對撼 CCTVB 公投↓↓↓
http://tv-voting.appledaily.com/