法律界猛人噚日雲集尖沙嘴洲際酒店，齊齊賀資深大律師湯家驊娶新抱做老爺。原來呢位新老爺噚日朝早起身一直心慌慌，勢估唔到佢老友、律政司司長袁國強送咁「厚禮」，爆出建議終院提請釋法，萬一啲法律界貴賓因此缺席咪大鑊？最終李國能、黃仁龍同馬道立等都有到賀，冇因此甩底，先令湯大狀放下心頭大石。
噚日嘅婚禮場地，儼如記者會扑咪大會，唔少記者喺場外等住問吓能官同黃仁龍等點睇再釋法？湯大狀辦喜事，冇理由搶風頭嘅，所以佢哋一概笑住唔回應。雖然湯大狀都反對律政司霸王硬上弓，但袁國強繼續赴會，只談風月、不談政事，席間仲同喺釋法問題上同佢唱反調嘅張達明言笑甚歡，搞到大班都忍唔住話：「乜你哋仲有偈傾咩？」現場所見能官摸住酒杯底周圍同人傾偈；張大姐、陳太同葉太就着到靚一靚去飲。
偕親家合唱助興
噚晚婚宴筵開67席，湯大狀獨子煒軒Justin係見習大狀，唔講唔知，原來佢老婆陳宛莛Mandy係「港版PSY」錢國偉女友陳宛蔚嘅妹妹，所以錢國偉噚晚都有去飲。夾開band嘅湯大狀就同親家老爺合唱一首英文歌助興，演出獲全場賓客熱烈鼓掌。
湯大狀眼見阿仔成家立室，都有啲激動，希望阿仔同新抱仔互相尊重、恩恩愛愛。八方建議新人年年結婚紀念日都擺十圍八圍，等老父湯大狀名正言順上台唱歌，過吓表演癮，咁就最孝心嘞。
mailto:[email protected]