呢排黃浩爆藝人飯局短片事件，之後又報稱遭人掌摑，搞到滿城風雨。另邊廂，梁思浩喺now嘅《娛樂審死官》節目，大談「娛樂圈暴力行為」呢個題目，思浩重提當年被掌摑事件更加泣不成聲，全身顫抖。思浩先大爆有娛樂圈中人借拍戲之名，公然教訓情敵，佢話：「嗰位女星本來同一位歌手拍拖，後尾俾另一位女藝人撬牆腳。山水有相逢，佢哋拍戲時相遇，嗰位女星就夾埋工作人員對付呢位情敵，即刻加對白鬧爆對方賤人、狐狸精，被摑嗰位因為唔夠權勢只好啞忍。」
患創傷後遺症
思浩仲重提佢01年遇襲同埋被掌摑事件，佢話俾人懸紅港幣一百萬發出「江湖追殺令」追殺，搞到佢長時間活喺恐慌中，思浩講到全身顫抖，仲泣不成聲，用咗個幾鐘先平復到情緒，勉強完成拍攝工作。思浩話其實當年警方畀咗兩個選擇佢，一係改名換姓去另一個國家，一係每日接受警察24小時保護，但佢覺得自己冇做錯，唔使退避，不過嗰時要警員送佢返工，搞到電視台冇人搵佢開工，冇出鏡就冇收入，終日以淚洗面，要警員每星期都帶佢睇心理醫生㖭。心理學博士連峻認為思浩仲有咁嘅反應，係創傷後遺症一種，思浩話：「我以為已經放低咗，但原來呢刻仲好驚。」
撰文：馮仁昭
一人一票投蘋果【萬千星虧】，對撼 CCTVB 公投↓↓↓
http://tv-voting.appledaily.com/