短池世錦賽周三喺土耳其伊斯坦堡展開賽事，美國依然威威，喺第一日5場比賽中，有3場都奪得金牌，當中洛捷迪喺男子200米自由式以1分41秒92，力挫德國嘅比迪文同同鄉戴亞。之後佢再喺男子4x100米自由式接力，為美國游得金牌，氣勢一時無兩。中國表現亦唔錯，雖然冇金牌，但係就有女飛魚焦劉洋同葉詩文，分別喺200米蝶式同400米個人四式中奪得銀牌。