富豪肯定日日鮑參翅肚？其實佢哋除咗去福臨門之外，平日生活都可以好down to earth，例如幫襯吓翠華（1314）！華華聽聞，原來新地（016）聯席主席郭炳聯都有幫襯開呢間高檔茶餐廳。
摸茶杯底交流
華華問起翠華主席李遠康，佢話同郭炳聯一齊喺翠華食過飯，原來郭生一向都好欣賞將本地文化發揚光大嘅企業，經朋友介紹之下，有機會一齊去翠華摸吓茶杯底，分享吓生意經。李遠康覺得，郭生為人好nice，佢最欣賞翠華嘅粟米汁、瑞士雞翼同魚蛋粉。
翠華已經成為咗香港茶餐廳嘅生招牌，李遠康話，平日都有唔少金融界名人幫襯，不過佢認為都係要專注自己工作，唔可以因為咁就自滿喎。滿招損，謙受益，睇嚟李主席都好有傳統美德。