噚日係香港上市公司商會成立十周年嘅大日子，身兼鷹君（041）主席嘅商會主席羅嘉瑞，中午請咗華華同一班傳媒朋友食飯慶祝吓。咁啱噚日政府宣佈向終審法院尋求人大釋法，以便解決雙非嬰兒同外傭嘅居港權問題，作為醫生兼醫管局前主席嘅羅嘉瑞就唱反調，話應該歡迎雙非嬰嚟香港咁話。
公院床位畀私院
羅主席認為，單單攔住內地孕婦唔畀佢地落嚟生仔，係治標唔治本。佢話要解決香港冇床位生仔問題其實好簡單，只要政府將啲公立醫院空置床位撥畀私家醫院做，咁就多多強國人落嚟生仔都冇有怕。佢又話，香港人其實唔好咁驚雙非落嚟搶資源，因為內地都畀咗好多優惠政策港人，「沙士後自由行嚟香港幫咗我哋好多，家唔好一味鬧佢哋。」
作為「唐營」支持者，羅嘉瑞席間透露近排有同唐唐見過面，仲話唐唐家好鬼開心。唔通係因為見到CY俾人狙擊所以咁開心？雖然羅主席唔肯直接評論CY上場後表現，但就好婉轉咁話，家陣政府做嘢其實好短視，淨係識得頭痛醫頭，腳痛醫腳，根本冇解決過問題嘅核心。
超人聖誕節外遊
講番上市公司商會十周年，噚晚搞埋慶祝晚宴，連超人李嘉誠都捧場，佢話今年聖誕會出埠過節，至於會唔會帶埋班孫仔去玩同買啲乜聖誕禮物，佢就好口密，問極都唔肯講！
李華華
mailto:[email protected]