民主黨新一屆主席選舉，由原來以為單仲偕自動當選變為「單雞」、卿姐以及區諾軒三人「嬲」字決。民主黨噚日整咗場閉門諮詢會，畀呢三位候選人推介政綱拉票，亦畀黨友即場提問。八方聽聞閉門會內火花四起，選情被看高一線嘅單雞，不時被質參加太多諮詢架構、立場太親政府？卿姐亦被黨友問：咁遲先話選主席，有冇誠意㗎？
據聞單雞承諾，大部份諮詢委員會任期屆滿時唔會再做；卿姐則重申自己有原則、有誠意，若做主席可以把持住。被睇成陪跑嘅八十後區諾軒，重申參選只為帶出黨內唔同嘅路線理念。
據聞唔使呢次閉門互片大會，唔少黨員已經心有所屬，準備喺呢個星期日黨員大會上投出心水之選。好多黨員話喎，最想新領導層帶領個黨走向年輕化，唔再好似以前一路老化。