華華見過唔少賓架加盟上市公司，佢哋多數都係做IR（投資者關係）或CFO（財務總監），即使有得再升，頂多都係升做董事，升到做主席嘅，華華真係冇乜見過。噚日富士康（2038）就公佈，年初已辭去行政總裁職務嘅陳偉良，連主席同執董都辭埋，接替佢嘅係7月先升做執董嘅童文欣，明年元旦履新。
今年47歲嘅童文欣係賓架出身，2004年加盟富士康前喺荷銀做資本市場部總監，多年來一直都係富士康嘅IR阿頭，但今年公司大執位，行政總裁換完又換，家陣連主席都換埋，可能公司真係決心重頭來過。
講番童文欣升做主席，華華一位科技界老友話好意外，雖然佢之前都有聽聞童文欣會再升，但真係冇諗過佢會升到主席位。老友仲話，賓架時嘅童文欣專做M&A，唔知佢坐正咗之後，會搵啲乜嘢項目收購呢？畢竟富士康都真係需要新衝擊嘅。