是是但但，唔只係某電視台新聞嘅方針，遠在南美洲嘅南美球會盃都一樣係咁。周三南美球會盃決賽次回合賽事，聖保羅迎戰堤格雷，經過火藥味濃厚嘅上半場之後，堤格雷聲稱俾槍指又俾人打而拒絕繼續比賽。賽會都廢事煩宣佈結束比賽，判聖保羅贏波封王，認真兒戲。
首回合兩隊0:0和局收場，周三次回合返到聖保羅主場，主隊喺開賽早段就已經連入兩球，盧卡斯洛迪古斯同奧斯華度羅蘭高先後喺22同28分鐘建功。成王敗寇，兩班球員喺決賽都踢得非常肉緊，上半場各有3位球員領黃牌，盧卡斯亦曾經俾對手開踭打到口角流血。到咗完半場之後，兩隊球員離場嗰陣先口角再動武，再演變成大混戰。最後聖保羅守將保羅米蘭達同堤格雷中場安祖戴亞斯都拎紅牌被逐，不過事件並冇因而平息。
槍手衝入客軍更衣室
堤格雷喺半場休息之後拒絕繼續比賽，執法球證奧斯斯等咗半個鐘見堤格雷都係冇影，就決定結束比賽；賽會隨即宣佈聖保羅封王，冇你咁好氣。奧斯斯賽後話當時乜都見唔到，只係話見到有堤格雷球員受傷，所以就終止比賽。
堤格雷教練哥洛薛圖事後講番件事：「半場休息嗰陣，有班大隻佬走咗入嚟更衣室，佢哋仲揸住兩支左輪手槍。之後仲有警察入嚟，用棍打我啲球員，真係人都癲，點踢落去呀。我哋嚟到巴西一路都冇好日子過，要喺離開酒店兩個鐘車程嘅地方進行訓練，去球場又要個幾鐘頭。」球場暴力我求大俠都見唔少，但踢咗一場半就決定冠軍嘅決賽都係第一次見。又出棍又有槍，畀你都唔敢出嚟喇。
聖保羅門將羅渣里奧就走出嚟踩多腳，指堤格雷球員喺場上挑釁辣火頭在先：「我哋都唔知發生咩事，對手嚟到巴西似打交多過踢波。」
