公用股中電（002）先宣佈加價，再趁機高位抽水，芬佬話九成係見頂，魏力都幾同意，因防守股係大市唔明朗先炒，目前市況好轉、基金追貨，換入周期股係合理決定。
有乜國策支持、而股價仲係好落後嘅板塊呢？魏力諗來諗去，都係風電股最值博。按走勢揀股，首選係龍源電力（916）。先睇市值，龍源高逾150億銀，遠高於中傳動（658）的38億及金風科技（2208）的15億，行業龍頭毋庸置疑。炒復蘇必然龍頭先行，近日走勢良好，可優先關注。
龍源為全球第二大風電營運商，向各地方電網賣電，直接受惠中國用電量上升，11月發電量按年增長7.9%，傳統電力股炒起，龍源具追落後概念。中傳動及金風則為風電設備製造商，目前風電業問題係設備太多，根本唔需要再增添設備，故走勢低迷不無道理。
龍源前日公佈，與國開行及六大內銀簽訂總值逾1500億人仔的金融戰略合作協議，協助集團十二五發展規劃的順利實施，加上批埋股，集資陰霾消除，有利日後炒上。
走勢上，龍源5月跌落4.47元低位後，逐步由低位爬升，昨突破5.4元三頂阻力，收復250日線，走勢大好。戰友可趁批股低吸，上望6蚊大關。
魏力
http://www.facebook.com/2012jason