在沙田馬場巧遇奧馬沙利夫，把握機會，請佢合照，快意之至。呢位老牌明星，八十歲生辰已過，仍然老當益壯，精神飽滿，問過佢有何保健秘方，佢微微笑咁話：「我每日在巴黎街頭步行五十分鐘，慢慢行，唔好緊張，放鬆晒嚟行，你睇我依家精神幾好！」係嘅，大概巴黎嘅路邊監測站標示空氣質素良好，若在港島軒尼詩道由灣仔行到去銅鑼灣，恐怕行到個肺有事。前輩賓架L在溫哥華享受退休生活，八十幾歲咯，面色、說話音量仲好過左丁山，問佢有何健身秘笈，又係日日行路啫，風雨不改，每天在住宅外街道行一小時，行平路噃，盡量避免上斜落斜。
奧馬沙利夫之同輩影星彼得奧圖已逝世，辛康納利睇嚟仲係好好精神，非常有型，奇連伊士活仍然活躍影壇，自編自導自演，自得其樂，老得有性格，不似香港有位老牌四哥，六十年代係英俊小生啫，今日仲要扮青春？好心啦，學吓胡楓咁自然，反為人人受落。
肥仔K冇睇過奧馬沙利夫嘅影片，見面也不知他是誰，但佢對馬開始有研究，話奧馬名下馬匹「唐鮑思高」（Don Bosco）嘅海外賽績一般，根本唔夠「雄心威龍」跑，唔駛捧場。左丁山卻因為同奧馬合照，對呢隻99倍嘅馬有啲幻想，買鴛鴦Q全餐，隻馬有前速，一開閘就彈出，由於騎師係法國名將柏兆雷，放馬最醒，仲興奮咗一陣㖭，最後放到入直路就散晒咯，跑第九，輸六個馬位俾冠軍「雄心威龍」。到第八場有3號「嘉登行宮」，馬主係「英女皇」，雖然係前度事頭婆，咪搞咯，避之則吉，結果女皇馬跑第六，輸四個幾馬位俾香港馬「加州萬里」。大明星馬與女皇馬雖然實力稍次，但因為馬主有名氣，好吸引傳媒注意，幾合市場推廣之用。馬會辦國際賽有聲有色，國際友人有賓至如歸之感，好似「拜倫勳爵」嘅練馬師在上星期六一早餐會所講：「香港馬會設施之好，招呼之一流，食物之可口，令我印象非常深刻。」如果明年馬會能繼續邀請到一啲名馬馬主如大明星、英女皇、費格遜爵士等等擁有嘅一級馬來港湊興，增加宣傳氣氛，全世界都會開心。