自小家中已像個動物園的莊思明（Lisa），養過的動物多不勝數，貓、狗、金魚、龜已是小兒科，老家在大馬的她曾飼養過雞、鴨、青蛙甚至白鶴。莊思明笑指家有搞事狗Tyson，每次與狗女Toffee配種都打餐死，未能成事。
撰文：譚倩宜
現時定居香港的大馬拿督女、在無綫拍劇的莊思明，家中雖再沒有雞、鴨、鶴等寵物，但她與兩個姐姐的住所仍飼養了五狗一兔，當中只得八個月大的芝娃娃Tyson最得其歡心：「有次我行經寵物店見到佢，當時已覺得Tyson好得意，但因為趕時間所以冇細睇，隔幾日再同家姐Mona（莊思華）行過見到佢仲喺寵物店，覺得好有緣，加上佢又好乖，所以就帶咗佢返屋企。」
Tyson膽大包天
別看Tyson個子小小，其實牠膽大包天，Lisa指Tyson經常跟家中的「公主」Toffee示愛，雖然每次均落得遍體鱗傷收場，但牠仍屢敗屢戰，Lisa說：「Tyson好鍾意同Toffee玩，成日跟住佢尾，不過Toffee唔多鍾意其他狗，每次Tyson行近Toffee都會打佢，本來我諗住買Tyson同Toffee配種，不過見到咁已經打定輸數配唔到，但Tyson好有毅力，到家都仲繼續。」
家有五隻狗的Lisa，笑指與牠們相處時發生過不少笑料：「Toffee好小器，每次話完佢，佢都會記住同報仇，試過有次話完佢，佢就咬到成屋都係紙巾，仲要擺個得戚樣出嚟。另外一隻狗就好鍾意將我露台嘅風水石叼走，偷偷放入我啲鞋度。」
養白鶴放生
除了搞事狗，Lisa家中還有一隻已16歲的影帝狗Brownie：「佢年紀最大，但又係最識做戲，之前佢氣管有事係咁咳，同佢睇完醫生食咗藥好耐都唔好，點知姐姐（指傭人）同我哋講番，話Brownie平日喺屋企冇咳，係見我哋返嚟先咳，因為想我哋關心佢，陪佢多啲。」Lisa養過雞、鴨、青蛙等，最教人嘖嘖稱奇的是她曾養白鶴：「其實隻鶴係媽咪行街市時見到，當時佢就要俾人劏，媽咪唔忍心於是買咗返嚟，結果我哋養咗佢幾個星期就放生咗佢。」
最想養懶猴
問莊思明還想養甚麼珍禽？她說：「我想養懶猴，上網睇過啲片，見佢行動甚至拎食物都好慢，覺得好可愛，不過可惜香港唔養得！」雖然未能飼養懶猴，但數月前Lisa已為莊家添加另一新成員棉花糖：「棉花糖係兔仔，復活節時我同朋友行街見到，當時佢做特價成個package連籠、飼料等，於是就同朋友各自買咗一隻，點知返到屋企就俾大家姐（莊思敏）鬧，話復活節求其買隻復活蛋咪算，點解要買隻兔仔返嚟？」
一人一票投蘋果【萬千星虧】，對撼 CCTVB 公投↓↓↓
http://tv-voting.appledaily.com/